Улс төрийн хилс хэрэгт хэлмэгдэгсдийн дурсгалыг хүндэтгэх 2015 оны 09 дүгээр сарын 10-ны өдрийг тохиолдуулан Цагаатгах ажлыг удирдан зохион байгуулах Улсын комисс өнөөдөр /2015.09.09/ Төрийн ордонд хэвлэлийн бага хурал зохион байгуулав.

Хурлыг Улсын комиссын Хэвлэлийн албаны төлөөлөгч Ж.Нэргүй нээж, Улсын комиссын дарга, Монгол Улсын Их Хурлын дэд дарга Л.Цог болон тус комиссын нарийн бичгийн дарга Д.Дамбасүрэн нар улс төрийн хилс хэрэгт хэлмэгдэгсдийн дурсгалыг хүндэтгэх өдөрт зориулан зохион байгуулах арга хэмжээний талаар сэтгүүлчдэд мэдээлэл хийлээ.

УИХ-ын дэд дарга, Улсын комиссын дарга Л.Цог хэлэхдээ, Монгол Улсын нийтээр тэмдэглэх баярын болон тэмдэглэлт өдрүүдийн тухай хуулийн дагуу улс төрийн хилс хэрэгт хэлмэгдэгсдийн дурсгалыг хүндэтгэх өдрийг 20 дахь удаагаа тэмдэглэн өнгөрүүлэх гэж байна. Энэ өдөр Монголын төр, улс төрийн хилс хэрэгт хэлмэгдсэн олон мянган иргэдийнхээ дурсгалыг хүндэтгэж, хэлмэгдлийн хор уршгийг орон түмэнд ойлгуулж таниулах хамгийн гол нь түүхийн тэр хар толбо болсон бусармаг үйлдэл давтагдахаас сэргийлэхэд чиглэгдсэн тодорхой ажил зохион байгуулж, хэлмэгдэгсэд болон тэдний гэр бүлийнхэнд хүндэтгэл үзүүлдэг уламжлалтай.

Тэрээр улс төрийн хилс хэрэгт хэлмэгдэгчдийг цагаатгах ажил дуусах шатандаа орж байгаа гэгддэг хэдий ч хараахан цагаатгагдаагүй цөөнгүй хүмүүс үлдсэн байх магадлал бас байдаг юм. Монгол Улсын Цагаатгах ажлыг удирдан зохион байгуулах Улсын комисс, түүний ажлын алба Тагнуулын Ерөнхий газар, төв, орон нутгийн архивууд, шүүх, прокурорын архивууд, аймгуудын салбар комиссуудтайгаа хамтран шалгагдаж цагаатгагдаагүй хэрэг байгаа эсэхийг эцэслэн нягталж шалгах ажлыг зориуд тусгайлан гүйцэтгэж байна гэв.

Цагаатгах ажиллагаа эхэлсэн 1939 оны 04 дүгээр сарын сүүлчээс хойш 2015 оны эхний 7 сарын байдлаар 31.1 мянга гаруй хүн улс төрийн хилс хэрэгт хэлмэгдсэн болох нь албан ёсоор тогтоогдож цагаатгагдан нэр төр нь сэргээгдээд байгаа болно. Улс төрийн хилс хэрэгт хэлмэгдэгсдийн нэр төрийг сэргээх, дурсгалыг мөнхжүүлэх ажил, арга хэмжээнүүд Улсын комисст болон төв, орон нутагт үргэлжлэн хийгдсээр байна гэлээ.

Цагаатгах ажлыг удирдан зохион байгуулах Улсын комиссын гишүүд сэтгүүлчдийн сонирхсон асуултад дэлгэрэнгүй хариулж мөн улс төрийн хилс хэрэгт хэлмэгдэгсдийн дурсгалыг хүндэтгэх 2015 оны 09 дүгээр сарын 10-ны өдрийн хөтөлбөрийг танилцууллаа.