Өнгөрсөн дөрөвдүгээр сард АН-ын дарга З.Энхболд намаа фракцгүй болсныг орон даяар онцгойлон зарласан. Түүнээс хойш таван сарын хугацаа өнгөрчээ. Энэ хугацаад АН-ыг фракцгүй болсныг илтгэх нэг ч үйл явдал болсонгүй. Хуучин шигээ дотооддоо асуудлаа шийдэж, эв түнжинг сахих бус эрх мэдлийн төлөөх зах, замбараагүй фракцуудын зодоон тус намын нэрийг хөөдөж байна. Энэ нь АН-ыг фракцууддаа хүлэгдсэн нам боллоо гэдгийг бэлхнээ илтгэнэ. АН олон фракцуудаа нэгтгэж, хэрүүл тэмцлээс салж чадаагүйг сая болж өнгөрсөн сайдын томилгоон дээр л тод харуулсан шүү дээ.

Засгийн газраас хөөгдсөн МАН-ын зургаан сайдын орны хүнийг томилох асуудлаар улс төр сар гаруйн хугацаанд бужигнасан. Сайд нарын томилгоо ингэж удсан шалтгаан нь нийлж нэгдэж намынхаа эрх ашгийн төлөө зүтгэх хөг нь өнгөрсөн АН-ын фракцуудын шуналтай холбоотой. Яамдын тоо, сайдын суудлыг тус намын фракцууд булаацалдаж бөөн хэрүүл, шуугиан болсны эцэст сая нэг юм сайд нараа томилсон. Тус нам “МОАХ”-д Зам тээврийн яамыг, “Шонхор"-т Хөдөлмөрийн яамыг, МҮДН-д Сангийн яамыг өгснөөр Засгаа хорлосон фракц хоорондын хэрүүл нь түр намжих шив. Үүнээс өмнө “Тэр яамыг манайх авна. Танайд өгөхгүй” гэсэн хэрүүл хийсээр цаг алдаж, нэр нүүрээ барсныг уншигчид санаж буй байх.

Тэгвэл "Ардчилсан намын дарга" гэх сэтэр зүүснийхээ дараа "Манай нам фракцгүй боллоо" хэмээн тунхаглаж асан З.Энхболд Ардчилсан нам фракцгүй болоогүй төдийгүй өөрөө ч намын дарга бус фракцын дарга гэдгийг илтгэх нэгэн жишээг олон нийтэд харууллаа.

Ардчилсан нам энэ хүний гар дээр амьсгал хурааж, АН биш Ардчилсан хүчний холбоо гэгч нам хойт дүрээр нь тодорсныг илтгэж байгаа бус уу.

Энэ нь Ардчилсан хүчний холбооны чуулган. Тэрбээр энэ чуулганаа 21 аймагт явуулж байна.  Энэ чинь юу гэсэн үг вэ?. З.Энхболд хэдийгээр батламжлагдаагүй хэдий ч одоогоор АН-ын дарга гэгдэж яваа. Тэгэхээр хэзээ ч, хаана ч АН-ыг төлөөлж дуугарах ёстой албан тушаалтан гэсэн үг. Гэтэл 2016 оны сонгууль хаяанд тулсан энэ эгзэгтэй цаг мөчид намынхаа нэрийн өмнөөс биш фракцийнхаа өмнөөс 21 аймагт чуулган зохион байгуулж яваа нь Ардчилсан нам энэ хүний гар дээр амьсгал хурааж, АН биш Ардчилсан хүчний холбоо гэгч нам хойт дүрээр нь тодорсныг илтгэж байгаа бус уу.

Сонгуулийн өмнөх жилд хариуцлагатай байж намынхаа нэр хүндийг сэргээх нь АН-ынхны хийх хамгийн чухал ажил. Өнгөрсөн гурван жилд "муухай" шуналаасаа болж  хоёр удаа Засгийн газрын бүтцээрээ оролдсон нь  АН-ын нэр хүндийг ард түмний дунд дордуулаад буй.

Иргэд АН-ыг нэгдмэл бодлогогүй, ёс зүйгүй, төлөвшөөгүй, эрх мэдлийн төлөөх зодооноосоо болж Монгол улсыг засаглал болон эдийн засгийн хямралд оруулсан хэмээн буруутгаж байгаа. Тэгэхээр одоо унасан нэр хүндээ сэргээхийн тулд фракц гэдэг чөтгөрийн тойрог, жижиг сэдвээсээ нэг удаа ч болов холдмоор байна. Ядаж л хариуцлагатай албан ажлуудаа фракцийн нэрийн өмнөөс хийдгээ больчихмоор л байгаа юм. 

24tsag.mn