Уул уурхайн сайд Р.Жигжид энэ сарын 10-нд Гацууртын ордод ажилласан байна. Тэрбээр өчигдөр болсон Засгийн газрын хуралдаанд тус ордод ажилласан тухай тайлангаа танилцуулжээ.
“Ноён уулаа аваръя” хөдөлгөөн Гацууртын ордод археологийн олдвор байдаг тул олборлолт явуулах боломжгүй тухай мэдээлэл хийж байсан. Холбогдох байгууллагуудын хийсэн судалгаагаар “Сентерра Гоулд” компанийн Гацууртын ордод эзэмжиш байгаа тайлбайд ямар нэгэн олдвор байхгүй гэсэн тайлан ирүүлсэн хэмээн Ерөнхий сайдын хэвлэлийн төлөөлөгч Ц.Мөнхтөр мэдээлэв.
Дээр дурьдсан дүгнэлт гарсны дараа тус хөдөлгөөнөөс олборлолт хийх явцад их хэмжээний доргилт үүсч илрээгүй байгаа олдворуудыг гэмтээх магадлалтай гэсэн тайлбар ирүүлсэн. Уг асуудлыг мөн холбогдох байгууллагууд судлан үзэж, олборлолт хийхэд ямар нэгэн түүхийн олдворт сөргөөр нөлөөлөхгүй гэсэн эхний ээлжийн дүгнэлтээ ирүүлсэн. Цаашид үргэлжлүүлэн судлах болно хэмээн мэдээлэлдээ дурьдав.
Тэрбээр, Р.Жигжид сайд Гацууртын ордыг ашиглах талаар орон нутгийн удирдлагуудын саналыг сонссон байна. Орон нутгийн удирдлагууд “Гацууртын ордыг ашигласнаар тус аймагт боловсрол, дэд бүтэц, бүтээн байгуулалтын чиглэлээр ямар ажил хийхээ нарийн тодорхойлсон тохиолдолд ордыг ашиглахад татгалзах зүйлгүй” гэсэн хариу ирүүлсэн байна.
Тус газарт гар аргаар алт олборлогчид буюу “нинжа” нар ихээр цугласан байна. Тухайлбал, энэ сарын 10-11-нийг шилжих шөнө 300 гаруй “нинжа” Гацууртын ордод дайрч орсон байна. Энэ үеэр нэг хүн шороонд дарагдаж, эмнэлэгт хүргэгдсэн байна. Тиймээс Засгийн газраас “Гацууртын ордод төрийн эзэмшлийн хувь тогтоох тухай тогтоол”-ын төслийг нэн дариу УИХ-д өргөн мэдүүлэх, эсхүл Засгийн газар бие даан хувь тогтоох боломж байгаа эсэхийг судлах шийдвэрт хүрсэн” гэлээ.
