Аж үйлдвэрийн сайд Д.Эрдэнэбат БНХАУ-ын Шэньси мужийн Сиань болон Бээжин хотноо зохион байгуулагдаж буй ШХАБ /Шанхайн хамтын ажиллагааны байгууллага/-ын Худалдаа, эдийн засгийн сайдын төвшний 14 дэх удаагийн уулзалтад оролцож байна.
Уулзалтын гол зорилго нь ШХАБ-ын гишүүн болон ажиглагч орнуудтай Монгол Улсын хамтын ажиллагааг гүнзгийрүүлэн хөгжүүлэхэд оршиж байгаа юм.
Аж үйлдвэрийн сайд ШХАБ-ын гишүүн болон ажиглагч статустай орнуудын төлөөлөгчидтэй уулзаж, Монгол Улсын худалдаа, эдийн засаг, аж үйлдвэрийн тодорхой асуудлын талаар танилцуулж, санал солилцоно.
Мөн ӨМӨЗО-ны Улаан хад хотноо байрлах зэсийн баяжмал хайлуулах, цэвэршүүлэх үйлдвэрийн цогцолбортой танилцаж, Монгол Улсад энэ чиглэлийн үйлдвэр байгуулах талаар туршлага судална.
Монгол Улс төв Азийн бүс нутгийн улс төр, эдийн засгийн хамтын үйл явцад идэвхтэй оролцох гадаад бодлогын зорилтын хүрээнд ШХАБ-ыг тус бүс нутгийн олон талт хамтын ажиллагаанд оролцох нэг чухал суваг гэж үзэн 2004 онд тус байгууллагад ажиглагчийн статустай болсон юм.
Т.Энхэлээ
