Ерөнхийлөгчийн хоригийг хүлээж авах эсэх асуудлыг УИХ-ын чуулганаар хэлэлцэн батлаад байгаа билээ. Хуулийн дагуу буюу УИХ-ын дэгийн тухай хуульд зааснаар Өршөөлийн тухай хуульд оруулах холбогдох нэмэлт, өөрчлөлтийн төслийг Хууль зүйн байнгын хороо боловсруулж, нэгдсэн чуулганаар батлуулах ёстой. Үүнтэй холбоотойгоор Хууль зүйн Байнгын хорооноос УИХ-ын гишүүн Ц.Оюунбаатараар ахлуулсан 11 гишүүнтэй ажлын хэсэг томилоод байгаа. Тус ажлын хэсгийн боловсруулсан нэмэлт, өөрчлөлтийн талаар УИХ дахь МАН-ын бүлгийн Ажлын албаны хуулийн зөвлөх Б.Энхбаяраас тодрууллаа. 

Тэрбээр "Хориг хүлээн авагдсан. Хориг хүлээн авагдсантай холбоотойгоор нэмэлт, өөрчлөлт оруулах ажлын хэсгийг Байнгын хорооноос томилсон. Ажлын хэсгийнхний оруулж ирж байгаа санал нь үндсэндээ Өршөөлийн хуулийн анхны хувилбар буюу хориг тавигдахаас өмнө ямар байсан яг тэр байдлаар нь буцаагаад хуулийг батлах санал оруулж ирсэн байгаа. Өөрөөр хэлбэл тав, нэг гэсэн тоог текстээр бичээд оруулж ирж байгаагаас өөрцгүй юм.  Үндсэндээ Ерөнхийлөгчийн хориг тавьсан хуулийн агуулга нь яг тэр чигээрээ, ахиж батлах гэж байна.   Ерөнхийлөгч 10 зүйл, 11 заалт гэмт хэргийг заримыг нь оруулах заримыг нь хасах гэсэн болзолтойгоор хориг тавьсан. Тухайн хэргүүд дээр тухайлсан санал хураалт явагдахгүй байдлаар асуудлыг шийдэх гэсэн санаархлыг хийж байна. Хэрвээ Ерөнхийлөгчийн тавьсан хоригийг агуулгыг нь авахгүйгээр дахиад батлах юм бол Монгол Улсын Ерөнхийлөгч дахин энэ асуудалд хориг тавих нөхцөл байдал үүсэхийг үгүйсгэх аргагүй. Сая хоригийг хүлээн авахад УИХ-ын чуулган дээр эсэргүүцсэн кноп дарсан зургаан гишүүн тэр ажлын хэсэгт орсон байгаа. 11 гишүүнтэй ажлын хэсэг дотроо тэр зургаан гишүүн олонх болоод ийм жонхуурсан байдал гаргаад байна" гэлээ.

Т.Энхэлээ