2014 оны 11 дүгээр сарын 21-ны өдөр:  Монгол улсын Ерөнхий сайд Ч.Сайханбилэгийг томилогдох үеэр УИХ-ын гишүүн Г.Уянга: "Би Ч.Сайханбилэгийг дэмжихгүй байгаа. Нүүрээ угаагаад нөгөө хувцсаа өмсөөд ороод ирлээ. АН-ын ҮЗХ төрийн дээр болж байгааг энэ явдал харуулж байна. Нөгөөтэйгүүр өнөөдөр Монгол Улсын ҮАБЗ-ийн 3 гишүүн бүгдээрээ АНУ-д төгссөн, неолиберализмийн төлөөлөгчид болчихоод байна. Ерөнхийлөгч Ц.Элбэгдорж  6 жил УИХ- д тайлангаа тавьсангүй. Ц.Элбэгдорж Үндсэн Хууль, УИХ руу алхам тутамдаа нулимж байгааг харахад хүнд байна. Мөн таны найз С.Баярцогт та хоёр Оюу Толгойн асуудлыг шийдэх зорилготой томилогдож байгаа юм уу гэж их айж байна. Ч.Сайханбилэг та томилогдох нь томилогдох бололтой. Гэхдээ та аль хэдийн ялагдчихаад томилогдож байна. Оюу толгойн луйврыг үргэлжлүүлнэ гэвэл би өөрөө огцруулах санал гаргана…" хэмээн хэлж байлаа.
 
 
5 сарын 19-ны өдөр: АНЭУ-ын Дубай хотноо Монгол Улсын Ерөнхий сайд  “Далд уурхайн бүтээн байгуулалтын төлөвлөгөө”-нд гарын үсэг зурсаны маргааш нь УИХ-ын гишүүн Г.Уянга хэвлэлийн бага хурал хийж хэлсэн ёсоороо Ерөнхий сайд Ч.Сайханбилэгтэй хариуцлага тооцож, Засгийн газрыг огцруулах асуудлыг өргөн барихаар болж, гарын үсэг цуглуулж эхэлснээ зарласан. Түүний санаачлагыг дэмжиж нийт хэдэн гишүүн гарын үсэг зурсан нь өнөөдрийг хүртэл тодорхой бус байсан. Г.Уянга гишүүн ч энэ талаар ихэд нууцалж байсан билээ. Тэгвэл  Ерөнхий сайдыг огцруулах бичигт нийт 8 гишүүн гарын үсэг зурсан байна. Хамгийн сүүлд УИХ-ын гишүүн Р.Амаржаргал Ерөнхий сайдыг огцруулахыг дэмжиж гарын үсэг зуржээ.

Ерөнхий сайдыг огцруулах бичигт одоогийн байдлаар УИХ-ын гишүүн Г.Уянга, Ц.Даваасүрэн, Х.Болорчулуун, С.Ганбаатар, Л.Цог, Б.Бат-Эрдэнэ, О.Баасанхүү, Р.Амаржаргал нар гарын үсэг зурсан байна. Нийт 19 гишүүн гарын үсэг зурвал уг тогтоолын төслийг УИХ-ын даргад өргөн мэдүүлж чуулганы хуралдаанаар хэлэлцүүлэх эрх зүйн боломжтой болох юм. Гарын үсэг цуглуулах үйл ажиллагаа удаашралтай явагдаж байгаа ч Ерөнхий сайд нэг л удаа хазгай гишгэвэл огцруулах асуудал гэрлийн хурдаар явагдаж магадгүй байгаа юм.

Огцруулах тогтоолд гарын үсэг зурсан гишүүдийн дийлэнх нь МАХН-МҮАН-ын "Шударга ёс" эвслээс болон Бие даагчид байгаа бол МАН-аас ганц Б.Бат-Эрдэнэ гишүүн байна. Б.Бат-Эрдэнэ гишүүний хувьд Ерөнхий сайдыг огцруулах болсон үндэслэлээ аль хэдийн тайлбарласан. Харин Р.Амаржаргал гишүүн ганцаараа намынхаа сайдыг огцруулахаар гарын үсэг зурсан нь олны анхаарлыг ихээхэн татаж байна. Тэр чухам яагаад ийм алхам хийх болов. Н.Алтанхуягийн Засгийн газрыг огцруулах асуудлыг тэрбээр намаасаа түүчээлж гаргаж ирж байсан. Мөн дэмжиж кноп дарсан. Оронд нь өөрөө Ерөнхий сайд болохыг даваан дээр мултарсан билээ. Харин энэ Засгийн газрын талаар тодорхой байр суурийг илэрхийлээгүй удаж буй. Чухам ямар үндэслэлээр гарын үсэг зурснаа тэрбээр удахгүй тайлбарлах биз.

Эх сурвалжийн мэдээлж буйгаар Өршөөлийн хуульд тавьсан Ерөнхийлөгчийн хориг бүрэн утгаараа хэрэгжих эсэхээс шалтгаалж МАХН-МҮАН-ынхан Ерөнхий сайдыг огцруулах асуудлыг ирэх арваннэгдүгээр сараас тавьж магадгүй гэнэ. Түүний ард З.Энхболд, Н.Энхбаяр нар түлхүүрийг түлхээд сууж байх сураг байна. Үйл явдал хэрхэн өрнөхийг хэлэхэд эрт байгаа ч З.Энхбаяр болон Н.Энхбаярын ажиллагаа Г.Уянга гишүүнтэй ямар нэгэн сэжимээр холбогдож магадгүй юм.

Т.Энхэлээ