Баянзүрх, Налайх дүүргийн иргэдээс автозам засвар, замын хөдөлгөөний аюулгүй байдлыг хангах чиглэлээр УИХ-ын гишүүн Ж.Батзанданд ирүүлсэн санал хүсэлтийг Нийслэлийн автозамын газар (НАЗГ) болон ЗЦГ-ын холбогдох албаны хүмүүст өнөөдөр хүлээлгэн өглөө.
УИХ-ын гишүүн Ж.Батзандан, “Өнгөрсөн долоо хоногт гэр хорооллын дахин төлөвлөлт, нийтийн тээврийн шинэчилсэн үйлчилгээний талаар ирүүлсэн санал хүсэлтийг НЗД Э.Бат-Үүлд хүргүүлсэн. Мөн эрүүл мэндийн салбарт тулгамдаж буй асуудлуудыг шийдвэрлэх чиглэлээр ЭМС-ын сайд Г.Шийлэгдамбад санал хүсэлтээ хүргүүлсэн.
Баянзүрх, Найлайх дүүрэгт гэрлэн дохиогүй, замын тэмдэг, тэмдэглэгээгүй, хурд сааруулагчгүй автзам олон байна. Энэ нь иргэдийн аюулгүй орчинд амьдрах эрхийг зөрчиж байна. Тиймээс энэ асуудлыг шийдвэрлэх чиглэлээр иргэдээс ирүүлсэн санал хүсэлтийг НХЗГ-ын Зам ашиглалтын байцаагч О.Энхбаатар, ЗЦГ-ын Техник, Замын хяналтын тасгийн дарга, цагдаагийн ахмад Б.Батзориг нарт хүргүүлж байна” гэлээ.
Энэ үеэр НАЗГ болон ЗЦГ-ын удирдлагууд 2015 онд Баянзүрх, Налайх дүүрэгт хийсэн автозам засвар, шинэчлэлийн талаар мэдээлэл хийлээ.
2015 онд НАЗГ-аас хорооллын доторх автозамын засвар, шинэчлэлд 1.5 тэрбум төгрөг төсөвлөсөн байна. Тус хөрөнгөөр Баянзүрх дүүргийн 4, 8, 16, 18 хороонд орон сууцны хорооллын дундах автозамд засвар, шинэчлэлийн ажил хийж байгаа аж. Одоогоор ажлын гүйцэтгэл 30 хувьтай байгаа бөгөөд 10 сарын 01-нд дуусахаар төлөвлөжээ. Түүнчлэн 13 замд нөхөөс хийх, 5 байршилд гэрлэн дохио шинээр байршуулахаар төлөвлөж, тендер зарлах ажлыг зохион байгуулж байна хэмээн НАЗГ-ын Зам ашиглалтын байцаагч О.Энхбаатар хэллээ.
Мөн ЗЦГ-ын Техник, замын хяналтын тасгийн дарга, цагдаагийн ахмад Б.Батзориг, ЗЦГ-аас хөдөлгөөний аюулгүй байдлын эсрэг гэмт хэрэг, учирч болох хор хөнөөлийг багасгах чиглэлээр үйл ажиллагаа явуулж байна. Баянзүрх дүүргийн хувьд онц ноцтой буюу хүнд хэлбэрийн автозамын осол, гэмт хэрэг буурч байгаа. Хөдөлгөөний аюулгүй байдлыг хангах зорилгоор эвдрэл ихтэй автозамыг шинэчлэн, засварлах хэд хэдэн ажлыг НАЗГ-т захиалж, гүйцэтгүүлсэн. Иргэдээс ирүүлсэн аливаа санал хүсэлтийг судлан, тухай бүрт нь хариу өгч байгаа” гэлээ.
