Засгийн газрын бүрэлдэхүүнд өөрчлөлт оруулсантай холбоотой зарим яамны дэд сайдыг чөлөөлж, оронд нь шинээр томилох юм. Энэ томилгоог Засгийн газрын өнөөдрийн хуралдаанд оруулахаар болжээ. Засагт хамтарч буй намууд дэд сайдад нэр дэвшигчдээ тодруулсан байна.

Тодруулбал, Засгийн газарт хамтран ажиллаж байсан МАН-аас томилогдсон дэд сайд нарыг чөлөөлж оронд нь Ардчилсан нам, МАХН- МҮАН-ын “Шударга ёс" эвслээс шинэ томилгоог хийнэ. Мөн сайдын суудал аваагүй ч гэсэн ИЗНН-аас дэд сайдад нэр дэвшүүлэх юм байна. Нийт зургаан дэд сайдын орон гарах бөгөөд Ардчилсан нам гурав, “Шударга ёс” эвсэл хоёр, ИЗНН-д нэг дэд сайдын суудал хуваарилжээ. Гадаад хэрэг, Боловсрол, соёл, шинжлэх ухаан, Эрүүл мэнд, спорт, Хүн амын хөгжил, нийгмийн хамгааллын дэд сайдад Ардчилсан нам болон ИЗНН-аас нэр дэвшүүлнэ. Харин “Шударга ёс” эвсэл Аж үйлдвэрийн болон Уул уурхайн дэд сайдад хүнээ нэр дэвшүүлэхээр болов.