Засгийн газрын  даваа гаригийн хуралдаанаар дэд сайд нарын томилгооны асуудлыг хэлэлцэх байсан ч хойшлуулжээ. Учир нь АН-ынхан дэд сайдад нэр дэвшигчдээ тодруулах асуудлаар тохиролцоонд хүрч чадаагүй байна. Уг нь  нэг сарын өмнөөс намууд дэд сайдад нэр дэвшигчдээ тодруулж эхэлсэн. Гэтэл өнөөдөр дахиад л АН-аас болж Засгийн газрын ажил гацаж байна.

МАН-ын огцорсон зургаан сайдын орны хүмүүсийг томилох үеэр АН-ын фракцууд албан тушаалын төлөө "зодолдож" сайд нарын томилгоог бараг нэг сараар сунжруулж байсан. Тэгвэл дэд сайд нарын асуудлаар ч тус намынхан сурсан зангаа гаргаж уг ажлыг бараг хоёр сар гацаах нь.

АН-д дэд сайд нарын томилгоог тойрсон нэг бэрхшээлтэй асуудал тулгараад байгаа гэнэ. Тодруулбал, намын дарга З.Энхболдын зүтгүүлж буй дэд сайдад нэр дэвшигчид нь бусад гишүүдийнхээ дэмжлэгийг авч чадахгүй байгаа аж. Түүнчлэн нэр дэвшигчидтэй нь холбоотой эсэргүүцэл, шүүмжлэл нам дотор нь их гарсан байна. Тиймээс хүмүүсээ өөрчилсөн сурагтай. Харин өөрчлөгдөж буй хүмүүсийнхээ оронд хэнийг томилох дээрээ тохиролцож чадахгүй байгаа аж.

Уг нь тус нам Д.Цэрэнчимэг, Н.Мөнхдаш, Ч.Батцогт нарыг дэд сайдад нэр дэвшүүлээд байсан юм. Гэхдээ АН-ыг төлөөлж ганц З.Энхболд нарын цөөн хүн дээрх хүмүүсийг зүтгүүлж буй учир бусад нь дэмжихгүй байх нь аргагүй. Нөгөөтэйгүүр дээрх гурван нэр дэвшигч хагалган, бутаргаж хэрүүл, тэмцэл хийдгээрээ алдартай, нам дотроо нэр муутай, элдэв болж, бүтэхгүй асуудалд орооцолдож явдаг хүмүүс юм. Тиймээс л  дэмжлэгийг авч чадахгүй эсэргүүцэлтэй тулгараад байгаа гэнэ. Тус намын гишүүдийн зүгээс нэр цэвэр хүмүүсийг дэд сайдад нэр дэвшүүлэх ёстой гэсэн байр суурийг илэрхийлж байгаа аж. Д.Цэрэнчимэг, Н.Мөнхдаш, Ч.Батцогт нарын талаарх дэлгэрэнгүй мэдээллийг энд дарж уншина уу.

Харин АН одоо яаралтай дэд сайдад нэр дэвшигчдээ дахин тодруулах шаардлагатай болж байна.

Эх сурвалжийн мэдээлж буйгаар АН гурав, “Шударга ёс” эвсэл болон ИЗНН тус бүр хоёр квот авахаар болсон юм байна. Анхны ярьж байсан хувилбарууд ч нэлээд өөрчлөгджээ. Анх АН- ынхан Уул уурхай, Аж үйлдвэр, Хүнс, хөдөө аж ахуйн дэд сайдад хүмүүсээ сойхоор ярьж байсан. Гэвч яриа тохиролцоо хийх явцад УУЯ, АҮЯ “Шударга ёс” эвсэлд ногдсон аж. Тэд Уул уурхайн дэд сайдаар МҮАН-ын Б.Цогтгэрэл, Аж үйлдвэрийн дэд сайдаар МАХН-ын Алаубекийг нэр дэвшүүлсэн байна. ИЗНН-ын хувьд Улс төрийн зөвлөлөөсөө Р.Булгамаа, З.Ган-Очир нарыг тодруулж, сойжээ. Тус намд анх Уул уурхайн болон Хүн амын хөгжил, нийгмийн хамгааллын дэд сайдын квот өгөхөөр ярьж байсан ч явцын дунд өөрчлөгдсөн аж. Улмаар Гадаад хэргийн, ХАХНХ-ын болон Хөдөө аж ахуйн дэд сайдын суудал АН-д ногдож мэдэх нь. БСШУЯ болон ЭМСЯ тус бүр хоёр дэд сайдтай. Одоо Боловсрол, соёл, шинжлэх ухааны дэд сайдаар МАХН-ын Б.Тулга ажиллаж буй. Тус яамны сайд нь АН-ын Л.Гантөмөр учраас үлдсэн нэг дэд сайдаа ИЗНН-д өгөх магаддал өндөр. Мөн ЭМС-ын дэд сайд нь АН-ын Г.Болдбаатар, сайд нь МАХН-ын Г.Шийлэгдамба тул үлдсэн нэг сул суудал ИЗНН-ынх болохоор байна.

Ямартай ч АН-ыг асуудлаа шийдтэл дэд сайдуудын томилгоо гацах нь.

Т.Энхэлээ