Зам тээврийн яамны Төрийн нарийн бичгийн даргаар ажиллаж байсан Б.Батзаяа Засгийн газраа шүүхэд өгч, ажилд эгүүлэн томилуулах хүсэлт гаргасан юм байна. Түүнийг өнгөрсөн оны наймдугаар сарын 7-ны 255 дугаар тогтоолоор дээрх албан тушаалаас чөлөөлсөн аж. Ерөнхий сайдаар Н.Алтанхуяг ажиллаж байх үед Засгийн газрын 2014 оны нэгдүгээр сарын 11-ний тогтоолыг биелүүлээгүй гэх зэрэг шалтгаар сахилгын шийтгэл ногдуулж, улмаар ажлаас нь чөлөөлсөн гэж тэрбээр шүүхэд гаргасан гомдолдоо дурдаад, “Улсын чанартай замын засвар, арчлалтын ажилд зориулан улсын төсөвт суусан хөрөнгийг орон нутгийн төсөвт шилжүүлээгүй гэсэн үндэслэлээр сахилгын шийтгэл ногдуулж байсан. Тухайн үед Зам, тээврийн сайд А.Гансүх Засгийн газрын дээрх тогтоолыг хэрэгжүүлэх үүднээс тухайн үеийн Эдийн засгийн хөгжлийн болон Сангийн сайдад албан тоот явуулсны дагуу Зам тээврийн сайдын багцад батлагдсан хөрөнгийг аймаг, нийслэлд шилжүүлэх боломжгүй гэсэн хариу ирсэн. Ийм байсаар атал үндэслэлгүйгээр чөлөөлсөн” хэмээжээ.

Шүүх түүний гомдлыг хүлээн авч хэлэлцээд ажилд нь буцаан томилох нь зүйтэй гэж шийдвэрлэжээ. Гэхдээ Засгийн газрын зүгээс Б.Батзаяаг буцаан ажилд нь авахгүй хэмээн үзэж давж заалдах болон хяналтын шатанд гомдол гаргасан байна. Хяналтын шатны шүүх хурал өчигдөр болох байсан ч Засгийн газрын төлөөлөгч нь хэрэгтэй гүйцэд танилцаж амжаагүй гэсэн шалтгаанаар шүүх хурлыг хойшлуулжээ.