МАХН-ын дарга Н.Энхбаярт холбогдох долоон тэрбумын авилгалын хэргийн шүүх хурал маргааш Сүхбаатарын шүүхэд 10.00 цагаас болно. Түүнийг Эрүүгийн хуулийн 150.3, 263.2-т зааснаар буруутган, До.Чулуунбаатар Д.Дуламсүрэн, Ж.Мягмаржаргал нартай хамт шүүхээр болоод буй. Хэдийгээр уг шүүх хурал өнгөрсөн сарын 24-нд товлогдсон ч Н.Энхбаярын биеийн байдал муу гэх шалтгаанаар хойшилсон. Тэгвэл энэ удаагийн шүүх хурал мөн түүний биеийн байдал муу гэх шалтгаанаар хойшлож магадгүй болжээ. Учир нь тэрээр эмнэлгээс гараагүй байгаа аж. Хэдийгээр эмч нарын зүгээс “Биеийн байдал нь сайн. Харин эрчимтэй хөдөлгөөн хийх хэрэгтэй. Хөдөлгөөн дутагдвал эрүүл мэндийн байдал муудна” гэсэн мэдээллийг өгсөн ч Н.Энхбаярын өмгөөлөгчид нь “Эмнэлгээс гарах болоогүй” гэв. Тиймээс маргааш болох шүүх хуралд Н.Энхбаяр оролцох эсэх нь одоогоор тодорхойгүй байгаа юм.
Хэрвээ гэм буруутай нь тогтоогдвол 150.3-т эд хөрөнгийг хурааж, таваас дээш арван жил хүртэл хугацаагаар хорих ялаар, 263.2-д тодорхой албан тушаал эрхлэх, үйл ажиллагаа явуулах эрхийг таван жил хүртэл хугацаагаар хасч хөдөлмөрийн хөлсний доод хэмжээг тавин нэгээс нэг зуу дахин нэмэгдүүлсэнтэй тэнцэх хэмжээний төгрөгөөр торгох, эсхүл таван жил хүртэл хугацаагаар хорих ял шийтгүүлэх аж.
