Г.Занданшатар гэдэг чамбайдуу улстөрч 2004 онд УИХ-ын гишүүн болж их улс төрд хөл тавьж байлаа. Үнэндээ улс төрийн үе дотроо ч, үе үе дундаас тодорч ялгарах барьц байхгүй. Овойж онцгойрох харизмгүй. Гэхдээ л өндөр дээд албан тушаалын одтой. Тэр од нь түүнийг “боловсролтой, ном уншдаг” гэж бусад нь ойлгодогтой холбоотой байх гэж улстөрийнхөн ярьдаг. УИХ-ын даргаар 2 сонгогдож, УИХ-ын сонгуульд ялагдчихаад Ерөнхий сайд хийж явна гэдэг яах аргагүй од мөн.
Харин тэрээр Ерөнхий сайдын суудлаар улс төрийн 20 жилийн карьераа сольж байх шиг.
Ард түмний эмзэг сэдвээр худлаа ярьдаг боллоо.
Монголд бүх төрлийн шатахуун хомсдоод 2 сар гаруй болж байна. Энэ хооронд Г.Занданшатар хэрэглэгчдийг байнга тайвшруулж ярьсан ч байдал дээрдсэнгүй.
Тэрээр 2025 оны 10 дугаар сарын 12-нд УОК-ын хурал дээр “Нийлүүлэлт хэвийн байхад түлш, шатахууны зохиомол хомсдол үүсгэж буй ААН-үүдийг шалгаж, шаардлагатай бол тусгай зөвшөөрлийг нь цуцлах хүртэл арга хэмжээ ав” гэж ярьсан. Юу ч хийгээгүй.
Засгийн газрын 2025 оны 10 дугаар сарын 28-ны ээлжит бус хуралдаанаар “Өнөөдрөөс Улаанбаатар хотын шатахуун түгээх станцууд хэрэглэгчдэд тавьсан шатахууны хязгаарлалтыг цуцлахаар боллоо” гэсэн. Худлаа байсан. Иргэд хэрэглэгчид өнөөдөр ч ШТС-уудад оочерлосоор л байна.
Мөн сүүлийн өдрүүдэд татварын байгууллагаас олон мянган аж ахуйн нэгжийн дансыг хааж байгаад тэнд байсан мөнгийг нь хураан авч байна. Гэтэл Ерөнхий сайд Г.Занданшатар 2025 оны 11 дүгээр сарын 14/-нд Татварын ерөнхий газарт ажиллахдаа “Улсын төсөвт 17.9 их наяд төгрөгийн орлого төвлөрүүл” гэж үүрэг болгожээ. Тийм учраас Сангийн яам, Татварын ерөнхий газар Ерөнхий сайд Г.Занданшатарын өгсөн үүргийг хэрэгжүүлж “Татвараа төлөхгүй байгаа бүх аж ахуйн нэгжийн дансыг хаа” гэж байгаад тонуул маягийн үйлдэл хийж байна. Энэ тухай зарим томоохон аж ахуйн нэгжийн захирлууд “Төсөв хүндэрсэн гээд гааль, татварын байгууллагууд аж ахуйн нэгжүүдийн данс тооцоог хааж, дотроос нь мэдэгдэлгүйгээр мөнгийг нь авч, татварын шалгалтуудыг шил дараалан орж байгаа талаар компаниуд мэдэгдээд эхэлсэн байна.
Төсөв хүндрэх гол шалтгаан нь ААН-үүдийн татвараа төлөхгүй байгаа байдал гэхээсээ илүү төрийн данхар бүтэц, үрэлгэн зардал, ашиггүй ажилладаг ТӨХК-үүд, тэдгээрийн зардал, эрүүл мэнд, нийгмийн даатгалын сангуудын дампуурал, ач холбогдлын эрэмбээрээ хойгуур байх хэрэгтэй хэрэггүй төслүүд гээд эдгээр нь энэ төсвийг хүндрүүлж байгаа бус уу” гэж эсэргүүцэж буйгаа тайлбарлаж байна.
Уг нь Г.Занданшатар 2025 оны 9 дүгээр сарын 2-нд “Данс хааж татвар төлүүлдэг бүдүүлэг аргыг хална” гээд зогсож байсан Ерөнхий сайд байгаа юм. Даанч хэлсэндээ хүрсэнгүй. Дандаа худлаа залдаг болов.
О.Наранмандах
