“Ройтерс” агентлаг “Рио Тинто”-гийн эсрэг 1.32 тэрбум ам.долларын нэхэмжлэлийг ОХУ-ын Калининград мужийн арбитрын шүүх “Русал”-ын талд шийдвэрлэснийг мэдээллээ. Өнгөрсөн долоо хоногт Монголд Оюутолгойн сонсголын үеэр Оросын тэрбумтан Олег Дерипаскагийн эзэмшлийн “Русал” “Рио Тинто”-той шүүхдэлцэж байгаа, шүүхдэлцэхдээ Монголын Оюутолгойг сонирхож байгаа тухай мэдээллийг Сангийн сайд асан С.Баярцогт дуулгаж байв.

Маргааны нэхэмжлэгч тал нь “Русал” бол хариуцагчаар “Рио Тинто” болон “Рио Тинто”-гийн хэд хэдэн охин компани байгаагийн нэг нь Австралийн Queensland Alumina Limited (QAL) юм. QAL-ийн 80 хувийг Рио Тинто, үлдсэнийг нь “Русал” эзэмшиж байв. Гэхдээ ОХУ Украинд дайны ажиллагаа эхлүүлсэнээс хойш Австрали Орос руу гаргах экспортын хэд хэдэн бүтээгдэхүүнд хориг тавьснаар “Русал” Австралид бизнесийн үйл ажиллагаа эрхэлж чадахгүй болсон.

Үүний дараа “Русал”-ын эзэмшиж байсан 20 хувийг “Рио Тинто” авч 100 хувь эзэмших болсон. “Русал” хувьцааны эрхээ сэргээхийн тулд шүүхэд хандсанаар маргаан эхэлсэн билээ. Калининград мужийн арбитрын шүүх энэ оны дөрөвдүгээр сард маргааныг хянан хэлэлцсэний дараа “Русал”-ынхан заргынхаа төлбөрт “Рио Тинто”-гийн Монгол Улс дахь Оюутолгой төслөөс хувь эзэмшихийг нэхэмжилж магадгүй гэсэн тайлбарууд өгч байсныг өнгөрсөн додоо хоногт болсон Оюутолгойн сонсголын үеэр л монголчууд сонссон юм. Мэдээж сонсголд гэрчээр дуудагдсан Сангийн сайд асан С.Баярцогтын ачаар…

О.Наранмандах