Холливудын жүжигчин Сидни Суини спортын бооцооны платформын сурталчилгаанд тоглосон нь олон улсын эмэгтэй тамирчдын хүчтэй эсэргүүцэлтэй тулгарчээ. Суинигийн тоглосон уг сурталчилгаа нь спортын үр дүнг таамаглах, арилжаалах боломжтой Novig платформыг сурталчилсан бөгөөд жүжигчин эмэгтэй теннис, гольф, бейсбол, мөсөн хоккей зэрэг спортын төрлүүдийг дуурайн тоглож буйгаар гардаг. Гэвч тэр ихэнх хэсэгтээ маш бага хувцастай, зарим үзэгдэлд хагас нүцгэн харагдаж байгаа нь эмэгтэйчүүдийг спортын амжилтаар бус бие галбираар нь ялгаварласан гэж шүүмжлэл дагуулаад байгаа юм.

Уг сурталчилгаа есдүгээр сарын 9-нд цацагдсанаас хойш сошиал орчинд хурдтай тархаж, олон мянган хэрэглэгчийн анхаарлыг татжээ. Сурталчилгаанд Суини “just sports” буюу “зөвхөн спорт” гэсэн санааг давтан хэлдэг ч дүрслэл нь үүнтэйгээ зөрчилдөж байна гэж шүүмжлэгчид үзжээ.

АНУ-ын гимнастикчин Грейси Крамер хамгийн анхны шүүмж хэлсэн хүн юм. Тэрбээр өөрийн бичлэгийг нийтлэн жинхэнэ тамирчин хүн ямар харагддаг талаар нийтлэл оруулсан байна.

Австралийн олимпын медальтнуудын дунд ч уг сурталчилгааг шүүмжилсэн хүмүүс олон байжээ. Усанд сэлэлтийн олимпын аварга Ариарне Титмус зэрэг тамирчид энэ төрлийн дүрслэл нь эмэгтэйчүүдийн спортын нэр хүнд, олон жилийн турш хийсэн хөдөлмөрийг гутааж болзошгүй гэж үзсэн байна. Австралийн Спортын хүрээлэн ч сурталчилгааны эсрэг байр сууриа илэрхийлэхдээ эмэгтэй тамирчдын жинхэнэ спортын дүр төрхийг харуулсан бичлэг нийтэлжээ.

Харин зарим шинжээч уг маргааныг Novig-ийн хувьд сурталчилгаагаа олон нийтэд хүргэх стратегийн нэг хэсэг гэж тайлбарлаж байна. Сурталчилгаа нь зориудаар өдөөн хатгасан, шуугиан дэгдээх хэлбэртэй байж, улмаар сошиал сүлжээнд вирус мэт тархах зорилготой байсан байж болзошгүй аж.

Ийнхүү Сидни Суинигийн оролцсон богино хэмжээний сурталчилгаа спортын бооцооны бүтээгдэхүүнийг сурталчлахаас илүүтэйгээр эмэгтэйчүүдийг спортод хэрхэн дүрслэх ёстой талаарх маргааныг дахин хурцатгалаа.

Л.Баяр