Украины Ерөнхийлөгч Владимир Зеленскийг тээвэрлэж явсан онгоц Молдав улсаас Норвегийг зорин хөөрөх үеэрээ дроны халдлагад өртөх дөхсөн талаар Норвегийн Ерөнхий сайд Йонас Гар Стёре мэдээлжээ. Тэрбээр лхагва гарагт Норвегийн NRK телевизэд өгсөн ярилцлагадаа “Зеленскийн онгоц Молдаваас хөөрөх гэж байхдаа дронд бараг өртсөн” гэж хэлсэн байна. Гэвч Ерөнхий сайд уг дрон онгоцонд хэр ойрхон байсан, эсвэл онгоцыг зориудаар онилсон эсэх талаар дэлгэрэнгүй мэдээлэл өгөөгүй байна.

Уг хэрэг мягмар гарагт болсон бөгөөд Зеленский Молдаваас Норвегийн нийслэл Осло руу нисэх гэж байжээ. Тухайн үед Молдавын агаарын орон зайд хоёр дрон нэвтэрсэн байна. Молдавын эрх баригчдын мэдээлснээр нэг дрон тус улсын хойд хэсгийн Рышкань дүүрэгт унаж, хэд хэдэн түймэр гаргасан бол нөгөө дрон Румын улсын нутаг дэвсгэр рүү нэвтэрчээ.

Үүнтэй холбоотойгоор Молдавын эрх баригчид агаарын орон зайгаа түр хугацаанд хааж, Зеленскийн онгоц зэрэг хэд хэдэн нислэгийн хуваарьт өөрчлөлт орсон байна. Дроны аюул арилсны дараа агаарын орон зайг нээж, Украины Ерөнхийлөгчийн онгоц Ослог зорин хөөрчээ.

Молдавын цагдаа нар осолдсон дроны үлдэгдлийг шалгахад ОХУ-ын байлдааны ажиллагаанд өргөн ашигладаг “Геран” төрлийн дронтой төстэй шинж тэмдэг илэрсэн гэж мэдээлсэн байна. Мөн уг дрон Румын улсын агаарын орон зайгаар дамжин өнгөрсөн бөгөөд Испанийн Агаарын цэргийн хүчний хоёр F-18 сөнөөгч онгоц түүний нислэгийн чиглэлийг хянажээ.

Украины талын өндөр албан тушаалтан Зеленскийн онгоцонд ойрхон өнгөрсөн дрон нь ОХУ-ын “Шахед” төрлийн тийрэлтэт хөдөлгүүртэй дрон байсан байж болзошгүй гэж үзэж байгаа аж. Гэхдээ дроныг онгоцыг зориудаар онилсон эсэхийг одоогоор тогтоогоогүй байна. Хэрэг явдлын улмаас хүний амь эрсдээгүй, онгоц гэмтээгүй байна.

Зеленский Норвегид хаан V Харальдын оршуулгад оролцохоор зорьсон бөгөөд уг ёслолд оролцсоныхоо дараа тус улсаас явжээ. Энэхүү хэрэг нь Орос-Украины дайны улмаас бүс нутгийн агаарын орон зай болон иргэний нислэгүүдэд учирч буй эрсдэл нэмэгдэж байгааг дахин харууллаа.

Л.Баяр