Apple компани өнөөдөр буюу есдүгээр сарын 9-нд шинэ бүтээгдэхүүнүүдээ танилцуулах тусгай арга хэмжээг зохион байгуулна. “Surprise and shine” нэртэй арга хэмжээ нь тус компанийн шинэ гүйцэтгэх захирал Жон Тернусын удирдлага дор болох анхны томоохон бүтээгдэхүүний танилцуулга гэдгээрээ онцлог юм. Тус арга хэмжээ АНУ-ын Калифорни муж дахь Apple Park-д болж, шинэ iPhone-уудын зэрэгцээ Apple Watch болон AirPods-ийн шинэ загваруудыг танилцуулах төлөвтэй байна. Apple арга хэмжээг Улаанбаатарын цагаар есдүгээр сарын 10-ны өглөө шууд дамжуулах юм.
iPhone 18 Pro, Pro Max загварууд
Энэ жилийн гол бүтээгдэхүүнээр iPhone 18 Pro болон iPhone 18 Pro Max загваруудыг танилцуулах төлөвтэй байна. Шинэ загварууд гадна хэлбэрийн хувьд өмнөх үеийн iPhone 17 Pro-той төстэй байх боловч дэлгэц, камер, батерей болон гүйцэтгэлд томоохон шинэчлэлт хийхээр хүлээгдэж байна.
Мөн шинэ үеийн A20 Pro чип, илүү удаан ажиллах батерей, жижигрүүлсэн Dynamic Island болон камерын системийн шинэчлэл хийх тухай мэдээллүүд гарсан. Камерт хувьсах диафрагмын систем нэвтрүүлэх боломжтой гэх таамаг ч байна. Гэхдээ эдгээр нь Apple-аас албан ёсоор баталгаажаагүй мэдээлэл юм.
Apple-ийн анхны эвхэгддэг iPhone
Энэ удаагийн танилцуулгын хамгийн их хүлээлт үүсгээд байгаа бүтээгдэхүүн нь Apple-ийн анхны эвхэгддэг iPhone юм. Одоогоор “iPhone Ultra” гэх нэрээр яригдаж буй уг төхөөрөмж ном, паспорт шиг дотогшоо эвхэгддэг загвартай байх төлөвтэй. Цуу яриагаар гадна талдаа ойролцоогоор 5.5 инчийн, задлахад 7.8 инч орчим хэмжээтэй OLED дэлгэцтэй байх аж. Reuters-ийн мэдээлснээр эвхэгддэг iPhone-ийн үнэ 2500 ам.доллароос давж болзошгүй бөгөөд Apple энэ бүтээгдэхүүнийг зах зээлийн хамгийн өндөр үнэтэй ухаалаг утаснуудын нэг болгохоор төлөвлөж байна.
Энгийн iPhone 18 энэ жил гарахгүй байж магадгүй
Apple өмнөх жилүүдийн уламжлалаас ялгаатайгаар iPhone 18-ийн бүх загварыг нэг дор танилцуулахгүй байх төлөвтэй байна. Одоогийн мэдээллээр iPhone 18 Pro болон Pro Max, мөн эвхэгддэг загварыг энэ намар танилцуулж, энгийн iPhone 18, iPhone 18e болон дараагийн iPhone Air загваруудыг 2027 оны хавар гаргаж болзошгүй байна.
Энэ өөрчлөлтийг дэлхийн хэмжээнд үүсээд буй санах ойн чипийн хомсдол, үйлдвэрлэлийн зардлын өсөлттэй холбон тайлбарлаж байгаа юм. Үүний улмаас шинэ iPhone-уудын үнэ өмнөх үеэс өсөх магадлалтай байна.
