Сонгуулийн тойргийн хорооддоо бүртгүүлсэн нэр дэвшигчид сонгуулийн сурталчилгаагаа өнөөдрөөс албан ёсоор эхэлж байна. Ирэх дөрвөн жилд бусдын өмнө бөхөлзөх үү, эсвэл гэдийх үү гэдгээ шийдэх гэж буй тул жишиг ёсоор сурталчилгаандаа мөнгө хайрлахгүй байгаа.
  Сонгуулийн тойргийн хорооддоо бүртгүүлсэн нэр дэвшигчид сонгуулийн сурталчилгаагаа өнөөдрөөс албан ёсоор эхэлж байна. Ирэх дөрвөн жилд бусдын өмнө бөхөлзөх үү, эсвэл гэдийх үү гэдгээ шийдэх гэж буй тул жишиг ёсоор сурталчилгаандаа мөнгө хайрлахгүй байгаа. Энэ өдрүүдэд нэр дэвшигчид халаасан дахь мөнгөөс гадна хамаг уран санаагаа шавхаж байна. Сонгуулийн сурталчилгааны хугацаа эхлээгүй байхад хүртэл янз бүрийн аргаар өөрсдийгөө сурталчилж эхлээд байгаа юм. Энэ дундаас Сангийн сайд асан С.Баярцогт телевизээр  цаг агаарын мэдээ уншсан нь хамгийн ихээр олны сонирхлыг татав. Үзэж чадаагүй нэг нь үзэх байж гэж халаглаж ч байх шиг. С.Баярцогтын 5-р сарын 28-ны  орой “Eagle TV”-ээр уншсан цаг агаарын мэдээ ерөөсөө л өнгөрсөн долоо хоногт ажил багтай хүмүүсийн амны зугаа болов.
   Энэ жил Сэлэнгэ аймгаас нэр дэвшихээр ханцуйгаа шамлаад байгаа тэрбээр “Манай Сэлэнгэд хур тунадас орохгүй нь” гэх зэргээр их л дотно, өөриймсөгөөр цаг агаарын мэдээ танилцуулав. Гишүүнийг “Пүрэв гарагт салхи 4-5 м/секунд, хур бороогүй” гэх зэргээр телвизийн сувгаар гэнэт гэрт нь айлчилсанд хүмүүс эхэндээ баахан гайхав. Цагаан сараар дуу хуур болж зурагтаар гардаг гишүүдийг алийг тэр гэхэв. Сонгууль дөхөхөөр цэнгээнт нэвтрүүлгээс авахуулаад хүүхдийн нэвтрүүлгээр гарахыг хүсдэг улс төрчдийг алийг тэр гэхэв. Гэхдээ Сангийн сайд байсан, бас ч гэж мэдлэгээрээ УИХ-ын гишүүд дунд толгой цохидог гэлцдэг С.Баярцогтыг хараад зарим хүний “нүд орой дээрээ гарчээ”. Ядаж байхад   С.Баярцогтоос түрүүлээд хэдхэн хоногийн өмнө Их Британы хунтайж Чарльз мөн л “BBC” телевизээр цаг агаарын мэдээ уншиж сенсаци тарьса билээ. Хунтайж  “BBC” телевизийн Шотланд дахь салбарын 90 жилийн ойд зориулан телевизийнхний урилгаар эхнэрийн хамт ийм мэдээ уншсан аж. Тиймээс С.Баярцогт гишүүнийг хунтайжаас санаа авсан, хуулсан гэж шүүмжлэх хүн олон байгаа юм. Үүний оронд Сангийн сайд байсан хүний хувьд эдийн засгаа ярьж суусан бол хүмүүс арай өөрөөр хүлээж авах байлаа. Гэсэн ч тэрбээр залуу хүний хувьд шинэ зүйл сэдэхийг хүссэн бололтой. Өмнө нь цагаан сарын дараа тэрбээр Сэлэнгэчүүдэд алтадсан Намсрай бурхан, зурхайн ном тараах шинэлэг санаагаараа хэл аманд өртөж байсныг цөөнгүй хүн санаж байгаа.

   Их Британы хунтайжтай барьцаж цаг агаарын мэдээ уншсан сайд асангийн сонгуулийн ритенгид  энэ нь хэр нөлөөлөх бол? Хунтайж Чарльзыг иргэд нь цаг агаарын мэдээг мэргэжлийн хөтлөгч шиг уншсан гэж эерэгээр дүгнэж байсан. Харин С.Баярцогтын сонгуулийн сурталчилгааны шинэ хувилбарыг монголчууд хэрхэн үнэлсэн бол?