Хоёр жилийн өмнө улсын Ерөнхий прокурорын дэргэдэх Мөрдөн байцаах албыг татан буулгаж АТГ-ын дэргэд аваачсан. Үүнийг буруу шийдвэр байсан гэж зарим хүмүүс ярьдаг. Тухайлбал, Прокурорын газраас тухайн албын ихэнх хэргийг өөрсдөө л хариуцах учиртай. Өөрөөр хэлбэл, цагдаа, АТГ хоёрын хэн нь ч шалгах боломжгүй хэргүүд бий гэж үзэж байгаагаа илэрхийлсэн юм. Тэгвэл АТГ-ын дэргэдэх мөрдөн байцаах албыг буцаан Улсын Ерөнхий прокурорын дэргэд аваачих төслийг УИХ-ын гишүүн Н.Алтанхуяг санаачилсан билээ.

Гэвч түүний санаачилсан хуулийн төслүүдийг УИХ-ын чуулганаар хэлэлцэлгүй удаж байгаа юм. Тодруулбал, УИХ-ын гишүүн Н.Алтанхуяг өнгөрсөн зургаадугаар сарын 4-нд УИХ-д өргөн барьсан боловч АТГ-аас Үндэсний Аюулгүй байдлын зөвлөлд хандан албан бичиг ирүүлж, УИХ-ын нэгдсэн чуулганы хуралдааны хэлэлцэх асуудлын жагсаалтанд явж байсан хуулийн төслийг гацаасан юм. Мөн үүний дараа хууль санаачлагч хаврын ээлжит чуулганы үеэр энэ хууль бус үйлдлээ зогсоохыг УИХ-ын дарга болон Ерөнхийлөгчөөс шаардсан боловч хэлэлцүүлэлгүй байсаар хаврын ээлжит болон зуны хоёр ээлжит бус чуулганы хугацааг өнгөрөөсөн билээ.

Ийнхүү дөрвөн cap дарагдсан төслийг УИХ-ын намрын чуулганаар хэлэлцэх асуудлын жагсаалтад оруулжээ. Уг нь эл хуулийн төслийг хэлэлцэж, шийдвэрлэвэл наад зах нь НҮБ-ын Эрүүдэн шүүхийн эсрэг конвенцийн заалтыг хэрэгжүүлэх эрх зүйн зохицуулалтыг нэмэгдүүлэх төдийгүй Цагдаагийн байгууллагын хэрэг бүртгэлт, мөрдөн байцаалтын ажиллагааны хяналт нь ашиг сонирхлын зөрчилгүй, холбогдох хуульд заасны дагуу хэрэгжих юм. Мөн Эрүүгийн байцаан шийтгэх хуульд заасан прокурорын хяналт хэрэгжих нөхцөл бүрдэх, Иргэд хууль хяналтын байгууллагын үйл ажиллагаанд хяналт тавих, өргөдөл, гомдол шийдвэрлүүлэх нөхцөл сайжрах гээд хар дагуулсан олон асууцлыг шийдэх гарц нь болно гэж хууль санаачлагч хэлж байгаа юм.

Т.Энхэлээ