УИХ-ын чуулганы өнөөдрийн хуралдаанаар Засгийн газраас өргөн мэдүүлсэн Зөрчил шалган шийдвэрлэх тухай болон холбогдох бусад хуулийн төслүүдийн  хэлэлцэх эсэх хэлэлцүүлгийг хийлээ.

Уг хуулийн төсөл баталснаар зөрчилд хариуцлага хүлээлгэх эрх бүхий албан тушаалтны үйл ажиллагаа нэгдсэн байдлаар журамлагдан иргэд, хуулийн этгээдийн эрх ашиг зөрчигдөх хүчин зүйл арилна. Мөн зөрчил шалган шийдвэрлэх ажиллагааны үндэслэл, журмыг хуулиар нарийвчлан зохицуулах нь эрх зүйт төр, хүмүүнлэг ардчилсан нийгмийг бэхжүүлэх үйлсэд томоохон хувь нэмэр оруулах гэнэ.

Энэ үеэр УИХ-ын гишүүн Х.Даваасүрэн, “Хүний эрхтэй холбоотой асуудлыг эргэлзээгүй байдлаар шийддэг болох хэрэгтэй. Зөрчлийг эрүүгийн хэрэг болгоод залуус ял аваад явдгийг энэ хууль арилгана. Тиймээс энэ хуулийг дэмжиж байна гэв. 

Хууль зүйн сайд Д.Дорлигжав гишүүдийн асуултад хариулах үеэрээ, “Гэрэл дохиогүй газраар гарахаас аваад хил гааль дээр очоод хөрөнгө мөнгөө хураалгах хүртэл олон зөрчил бий. Зөрчлийг нэг бүрчлэн бичиж оруулах боломжгүй. Тиймээс тусд нь стандарт баталж гаргана” гэв.  Гишүүд асуулт асууж, үг хэлсний дараа санал хураалт явуулахад уг хуулийн төслийг хэлэлцэх  нь зүйтэй гэж үзсэн тул анхны хэлэлцүүлэгт бэлтгүүлэхээр Хууль зүйн байнгын хороонд шилжүүлэв.