Төрийн байгуулалтын байнгын хорооны хуралдаанаар 2016 оны төсвийн төслийг дагалдан өргөн мэдүүлсэн хууль, тогтоолын төслүүдийг хэлэлцэж байна. 

Энэ үеэр 2016 оны наймдугаар сарын 1-ээс эхлэн 9 яамтайгаар ажиллах тухай хуулийн төслийг хэлэлцэж эхэлсэн ч Засгийн газраас буцаан татах болсноо мэдэгдэж, Төрийн байгуулалтын байнгын хороонд бичиг ирүүлжээ. Уг бичгийг тус байнгын хорооны дарга А.Бакей уншиж танилцууллаа. 

УИХ-ын зарим гишүүд уг хуулийн төслийг шүүмжилж "2016 оны сонгуулийн дараа байгуулах Засгийн газрын бүрэн эрхэд халдаж байгаа тул 2016 оны нэгдүгээр сарын 01-нээс хэрэгжүүлж эхлэх нь зөв" гэсэн саналыг гаргасан аж. Хэрвээ нэгдүгээр сарын 1-ээс хэрэгжүүлж эхэлбэл өнөөдрийн Засгийн газрын тогтвортой байдалд сөргөөр нөлөөлөх магадлалтай тул буцаан татахаар болсноо Ерөнхий сайд тус бичигтээ дурьдсан байна.

Тэрбээр мөн "Эдийн засгийн хүндрэлтэй байгаа өнөөгийн нөхцөлд Засгийн газрын тогтворгүй байдалд орох нь муу үр дагавар үзүүлнэ. Тиймээс дээрх хуулийн төслүүдийг эгүүлэн татаж байна. Түүнчлэн Засгийн газар төрийн байгуулагын бүтэц, зохион байгуулалтыг боловсронгуй болгож, чиг үүргийн давхардлыг арилгах, төрийн албаны зардлыг бууруулах зорилгоосоо ухрахгүй бөгөөд уг асуудлыг Үндсэн хуулийн нэмэлт өөрчлөлтийн хүрээнд ажиллах болно" гэжээ.

Т.Хулан