Цагдаагийн байгууллагын алба хаагчид сайн үйлсийн аянд нэгдэж, нийгмийн эмзэг бүхний эсрэг тэмцдэг гэдгийг хүн бүр мэдэж байгаа. Өнгөрсөн удаад л гэхэд ЦЕГ-ын алба хаагчид бусдад амьдрал бэлэглэж "Цус хандивлах", эрүүл цэвэрхэн орчинд аж төрөх "Хог цэвэрлэх" аянд идэвхтэй оролцож байсан. Харин маргааш тэнэмэл, орон гэргүй иргэдэд тусламж үзүүлж, усанд оруулж, хооллож ундлах арга хэмжээг зохион байгуулах гэж байгаа билээ.

Орон нутгийн цагдаагийн газрууд ч сайн үйлс, нийгмийн ажил үйлчилгээнд идэвхтэй оролцдог гэдгийг иргэдийн зүгээс хэлдэг. Хамгийн сүүлд л гэхэд  Сэлэнгэ аймаг дахь Цагдаагийн газрын хамт олон  хорт хавдрын эсрэг аянд нэгдэж, хандив цуглуулах уриалга гаргаад байгаа билээ.

 Тус цагдаагийн газрынхан Хавдар судлалын эмнэлгийн барилгын өргөтгөлийн ажил, тоног төхөөрөмж суурилуулахад хандив өргөх аяныг дэмжин аймгийнхаа бусад байгууллагыг сайн үйлсэд нэгдэхийг уриалаад байна. Энэхүү санаачлагыг дэмжиж иргэдийг хорт хавдрын өвчнөөс урьдчилан сэргийлэх, эрт илрүүлэх, эмчлэх сайн үйлсэд сэтгэлийн хандив өргөхөө  Сэлэнгэ аймгийн төрийн байгууллагынхан мэдэгдлээ.

Ийн хүний амь нас, эрүүл мэндийг авран хамгаалж амар тайван нийгмийн төлөө тэмцдэг цагдаагийн алба хаагчид сайн үйлсийн аян, хүмүүнлэгийн үйл ажиллагаанд ч идэвхтэй оролцсоор байна.

Д.Ундрах /24tsag.mn/