УИХ-ын чуулганы хуралдаанаар Засгийн газраас өргөн мэдүүлсэн 2015 оны төсвийн хүрээний мэдэгдэл, 2016-2017 оны төсвийн төсөөллийн тухай хуульд өөрчлөлт оруулах тухай хуулийн төслийг хэлэлцэж байна.
Хэлэлцэж буй асуудалтай холбогдуулан УИХ-ын гишүүд Сангийн сайд Б.Болороос асуулт асууж, хариулт авлаа.
Тухайлбал, УИХ-ын гишүүн Р.Амаржаргал " Төсөвт хийж буй тодотголыг зөв зүйтэй болно гэж хэн мэдээд байгаа юм. Бид нарыг харахаар бодлогоо бодож чадахгүй сурагч шиг л харагдаж байна. Нэг л ухаанаа олж өгөхгүй байна Б.Болор сайдаа. Энэ нь Сангийн яамныхны чадвартай л холбоотой байха. Түүнийг үзэж, харж байгаа УИХ ч арчаатай нөхөр биш болчихоод байна. Төсвөө улирлаар нь батлаад явж болохгүй юу. Хэлэлцсэн, баталсан болоод яваад байдаг. Гэтэл нөгөө эдийн засаг нь маргааш гэхэд бахь байрандаа л байна шүү дээ" гэв.
Түүний асуултад Б.Болор сайд хариулахдаа "Төсвийн тодотгол эдийн засгийн нөхцөл байдалтайгаа уялдаж байгаа юм. Гурав, гурван сараар нь батлаад явдаг жишиг гадны улсуудад байдаг. Төсвийн тодотголыг батлахдаа тодорхой хэмжээгээр болно гэж тооцоолж, оруулж ирсэн. Эдийн засгийн нөхцөл байдал өөрчлөгдөж байгаа учраас ингэж байна. Энэ зөв зүйл биш. Засгийн газраас өргөн барьсан төсвийг УИХ шал өөр болгодог. Энэ бас их буруу" гэв.
Харин УИХ-ын гишүүн Л.Болд: "Сургууль, цэцэрлэгийн хүрэлцээ үнэхээр муу байна. Энэ үед сургууль, цэцэрлэг барих төсөв улсын төсөвт хэр тусгагдсан бэ. Хүүхдүүдийнхээ сурч, боловсрох эрх чөлөөг дэмжиж сургууль, цэцэрлэг барих асуудлыг төсөвтэйгээ хэр уялдуулав" гэлээ.
Түүний асуултад Төсвийн байнгын хорооны дарга Ч.Улаан хариулахдаа "Засгийн газраас өргөн мэдүүлсэн төсвийн төсөөлөлд зайлшгүй шаардлагатай гэсэн зарим өөрчлөлтийг оруулахаар болсон. Бусад асуудлыг зөвлөлдөөд явж байгаа" гэлээ.
Харин УИХ-ын дарга З.Энхболд сонгогчиддоо таалагдах гэж ярьдаг зүйлээ заавал энэ үед ярих шаардлага байн уу. Харагдаж болдог газраа харагдал даа" гэлээ.
Ингээд хуулийг дагалдсан зарчмын зөрүүтэй саналаар санал хураахад гишүүдийн олонх нь дэмжлээ. Засгийн газраас өргөн мэдүүлсэн 2015 оны төсвийн хүрээний мэдэгдэл, 2016-2017 оны төсвийн төсөөллийн тухай хуульд өөрчлөлт оруулах тухай хуулийн төслийн эцсийн хэлэлцүүлгийг хийлгэхээр Төсвийн байнгын хороонд шилжүүллээ.
Одоо Төсвийн хүрээний мэдэгдлийн хүрээнд бусад дагалдах хуулийг хэлэлцэж байна.
Т.Хулан
