ЧУУЛГАН

УИХ-ын чуулганы хуралдаанаар Монгол улсын нэгдсэн төсвийн 2015 оны төсвийн хүрээний мэдэгдэл, 2016-2017 оны төсвийн төсөөллийн тухай хуульд өөрчлөлт оруулах тухай хуулийн төслийн хоёр дахь хэлэлцүүлгийг хэлэлцэж байна. Хэлэлцэж буй асуудалтай холбогдуулан УИХ-ын гишүүд асуулт, асууж хариулт авч байна.

Мөн зарчмын зөрүүтэй саналаар санал хураалгаж байна.

Тухайлбал, УИХ-ын гишүүн Д.Дэмбэрэл төрийн өндөр албан тушаалтны цалинг бууруулахыг зогсооё гэсэн саналыг гаргалаа. 

Түүний гаргасан саналыг УИХ-ын гишүүн Б.Ганбат дэмжиж “Цалин хасах нь төрийн дээд албан тушаалтнуудыг авлигаар амьдардаг гэсэнтэй адил хэрэг болно. Тиймээс цалинг хасч болохгүй” гэсэн юм.

Үүнд Төсвийн байнгын хорооны дарга Ч.Улаан хариулахдаа “Хувь хүний оноосон цалинг бууруулах нь Төрийн албаны тухай хуулийг зөрчинө. Уг заалтыг өөрчлөх саналыг Засгийн газраас оруулж ирээгүй” гэлээ.

ЗГХЭГ-ын дарга С.Баярцогт, “Хэд хэдэн хуулинд төрийн албаныхны цалинг одоогийн байгаагаас нь бууруулж болохгүй гэж заасан байдаг. Хуульчидтай энэ талаар ярилцсан. УИХ төсөв батлах онцгой эрхтэй. Иймээс УИХ өөрөө шийдэх боломжтой гэсэн тайлбар өгсөн. Шаардлагатай гэж үзвэл тэдгээр хуулийн төслийг өөрчилж болно. Гэхдээ одоо цалин бууруулахгүй гэж ярьж байгаа учир хуулиа өөрчлөх шаардлагагүй болж байна” гэв.

Ингээд Д.Дэмбэрэл гишүүний гаргасан саналаар санал хураалт явуулахад нийт гишүүдийн 73,3 хувийн дэмжлэг авлаа.

Т.Энхэлээ