УИХ-ын үдээс хойшхи чуулганы хуралдаанаар Өршөөлийн хуулийг хэлэлцэж байна. Хуралдааны эхэнд УИХ-ын Н.Батбаяр "Өршөөлийн хуульд 76 гишүүнийг хамруулахгүй байя. Тэгэхгүй бол хүмүүс энэ 76 гишүүн өөрсдөдөө зориулж өршөөлийн хуулийг батлах гэж байна гэсэн ойлголттой байна" гэдэг саналыг гаргалаа.
Түүнийг саналыг УИХ-ын дарга З.Энхболд дэмжиж "Зөв зүйтэй" санал байна гэсэн юм.
Харин Хууль зүйн байнгын хорооны дарга Д.Ганбат "Хууль зүйн байнгын хороо хуралдах ёстой, гишүүд бүгд сууж байна. Хуралдахад асуудалгүй" гэсэн хариултыг өглөө.
Харин УИХ-ын гишүүн Л.Энх-Амгалан Өршөөлийн хууль 76-д үйлчлэхгүй гэдэг нь буруу гэлээ. Тэрбээр "Захиргааны 19800 албан тушаалтан байгаа, дээр нь улстөрийн албан тушаалтан 1600 байгаа, энэ хүмүүсийг өршөөх юм уу. Ард иргэд таван заалтыг асуугаад байгаа. Хээл хахууль авсан хүнийг өршөөх юм уу, албан тушаалаа урвуулан ашигласныг өршөөх юм уу, хууль бусаар хөрөнгөжсөнийг өршөөх юм уу, төсвийн хөрөнгийг зориулалт бусаар ашигласан хүмүүсийг өршөөх юм уу. Энэ тав орохгүй юм, хамрагдахгүй юм гэдэг хариултыг өгөөч" гэлээ.
Т.Энхэлээ
