УИХ-ын Эдийн засгийн байнгын хорооны өнөөдрийн хуралдаанаар Эгийн голын усан цахилгаан станцын хөрөнгө оруулалтын асуудлыг хэлэлцлээ. БНХАУ-ын Экспорт, Импорт банкнаас зээлэх 1 тэрбум долларын 827 сая долларыг нь Эгийн голын усан цахилгаан станцын бүтээн байгуулалтад зарцуулахаар төлөвлөсөн байна.

Хуралдааны үеэр  УИХ-ын гишүүн Ц.Нямдорж “Анх Эгийн голын усан цахилгаан станцыг барих тухай ярьж байхад 320 сая ам.доллар зарцуулна гэж байсан. Гэтэл энэ удаагийн төсөлд зардал нь 2.6 дахин нэмэгдсэн байна. Үүний шалтгаан нь юу вэ. Зээлийг улсын төсвөөс төлөх үү” хэмээн асуулаа.

Эрчим хүчний сайд Д.Зоригт, "Зардал 16 үзүүлэлтээр нэмэгдсэн. Тухайлбал, суурилагдсан хүчин чадлын хэмжээ 95 мВт-аар, усан сангийн далангийн эзэлхүүн 910 мянган куб метрээр, усан сангийн эзэлхүүн 2.7 тэрбум куб метрээр өссөн зэргийг нэрлэж болох юм. Эгийн голын усан цахилгаан станц өөрийнхөө үйл ажиллагаанаас зээлээ эгүүлэн төлнө. Улсын төсвөөс хөрөнгө гаргахгүй” хэмээн хариуллаа.

Ийнхүү 820 сая долларыг Эгийн голын усан цахилгаан станцын бүтээн байгуулалтын  ажилд зарцуулахыг гишүүдийн саналаар шийдэх үед тэдний 83.3 хувь нь дэмжлээ.