АТГ-аас  Эрүүл мэнд, спортын яамны сайд Г.Шийлэгдамбыг баривчилсан талаар манай сайт мэдээлсэн. Ингэхдээ бүр хээл хахууль авч байхад нь газар дээр нь илрүүлсэн гэж зарим эх сурвалж мэдээллээд байгаа. Харин нөгөөтэйгүүр төрөх эмнэлгийн мөнгөнөөс 9.7 тэрбум төгрөг дутсанаас болсон гэж үзэж байгаа юм.

Тэгвэл Г.Шийлэгдамбыг баривчилсан асуудлаар дөнгөж сая МАХН-ын нарийн бичгийн дарга Ц.Шаравдорж, Э.Эрдэнэжамьяан нар мэдээлэл хийлээ.

Тэдний хэлж буйгаар Г.Шийлэгдамбыг баривчилсан нь хэлмэгдүүлэлт, улс төрийн зорилготой гүтгэлэг гэсэн юм. Ингээд тус бүрийнх нь тайлбарыг дор сийрүүлье.

Э.Эрдэнэжамьяан: Г.Шийлэгдамбыг  АТГ-ынхан өглөө болтол хаана байлгаж, байцаалт авсан бэ гэдэг их сонин

-Г.Шийлэгдамбыг баривчилсан талаар танай нам ямар байр суурьтай байгаа вэ?
-Та бүхний мэдэж буйгаар МАХН-ын Ерөнхий нарийн бичгийн дарга, ЭМС-ын сайд Г.Шийлэгдамбыг өчигдөр АТГ-ынхан баривчилсан байгаа. Үүнтэй холбоотой намынхаа байр суурийг хууль ч хүний хувьд илэрхийлж байна. Өчигдрийн баривчилгаа бол МАХН-ын удирдлагуудын өмнө хийж байгаа хэлмэгдүүлэлтийн дараагийн үе шат гэж үзэж байна. Энэ бол эрт орой хэзээ нэгэн цагт МАХН-ын гишүүд, сайд нар, удирдлагуудын хэн рүү нь ч ирэх заналхийлэл. Хамгийн гол нь хэзээ, хэнийг гэдэг нь нууцлагдмал байсан ч өчигдөр МАХН-ын ерөнхий нарийн бичгийн даргыг баривчиллаа.

Энэ бол цэвэр улс төрийн зорилготой, сонгууль дөхсөнтэй холбоотой, МАХН-ын нэр хүнд сэргэж байгаа хийгээд үйл ажиллагаа идэвхижиж байгаатай холбоотой юм. Өөрөөр хэлбэл, бидний үйл ажиллагааг сааруулах, айлгах зорилготой ажиллагааны нэг хэсэг.

-Ямар учраас хэлмэгдүүлэлт гэж үзэж байгаа юм бэ?
-МАХН бол иймэрхүү хэлмэгдүүлэлтийг саяхныг хүртэл үзсэн. Тэгвэл бид ийм хэлмэгдүүлэлтээс айхгүй. Бид “Оюутолгой”-г ард түмэндээ ашигтай байлгахын төлөө, мөн “Тавантолгой”-г олон нийтэд ашигтай байлгахын төлөө, зах замбараагүй төр засгийг эмх журманд нь оруулахын төлөө энэ байтугай зүйлээс айхгүй.

-Өчигдөр таныг АТГ-т очиход  Г.Шийлэгдамба байхгүй байсан. Олдоогүй гэж байсан?
-Өчигдөр бид баривчилсан гэдгийг сонсоод хаана байна, зохих журмын дагуу баривчилсан уу гэж шалгаж үзсэн. Монгол Улсын шадар сайд Ц.Оюунбаатар, УИХ-ын гишүүн З.Баянсэлэнгэ бид хамт очсон. Бид мөрдөн байцаалтад саад учруулая гэсэн зорилгогүй. Зөвхөн хүний эрхийг хангаж байна уу гэдэг үүднээс очсон. Харамсалтай нь 12.00-02.00 цаг хүртэл АТГ-ынхан “Тийм хүн байхгүй” гэсээр байсан. Улмаар бид Хорих 461 дүгээр ангид очиход “манай дээр байхгүй, ийм хүмүүс хоригдоогүй” гэх мэт мэдээлэл өгсөөр байсан. Гэтэл бидэнд олдсон мэдээллээр 04.00 цагийн үед буюу үүрээр Хорих 461 дүгээр ангид очсон байсан. Тэгэхээр өглөө болтол АТГ энэ хүнийг хаана юу хийлгэж, ямар байдлаар байцаалт авсан нь тодорхойгүй байна. Бидний очиход хамтдаа баригдсан 4-5 хүн нь ажлын бус цагаар, прокурор, шүүхийн тогтоолгүйгээр, хүйтэн газар хоол ундгүй хоригдож байсан.  Өөрөөр хэлбэл, орчин үеийн тамалгаа маягаар байж байгаад тэд суллагдсан. Өнөөдрөөс эхэлж тэдгээр хүмүүс байцаалтаа өгнө.

Ц.Шаравдорж: Г.Шийлэгдамба нарыг шөнөжингөө өмгөөлөгчгүйгээр байцаалт авч дарамталсан

-Г.Шийлэгдамбыг хэн хэлмэгдүүлсэн гэж үзэж байна?
-МАХН өнөөгийн Засгийн газарт орж, УИХ-д суудалтай, улс төрийн өөрийн байр суурь, үзэл бодолтой улс төрийн хүчний хувьд өнөөдөр Монголчуудынхаа төлөө үйл ажиллагаагаа явуулж байгаа. Энэ үйл ажиллагааг таслан зогсоох, саад болох, ямарваа нэгэн алхамуудтай бид эрс шийдвэртэй тэмцэх болно.

Бид олон шалгалтыг давсан нам. Одоо ч бид янз бүрийн шахалт, шаардлагад хариу өгч байгаа. Цаашдаа ч Монгол орны төлөө тэмцэх зориг дүүрэн байна.

Монгол оронд өнөөдөр нийтийг хамарсан мөрдөлт, хэлмэгдүүлэлт, тагнах чагнах ажиллагаа ердийн үзэгдэл болсон байна. 1937 оны их хэлмэгдүүлэлтийг бид одоо ч ярьдаг. Тэр хэлмэгдүүлэлтийг дахин давтахгүй байхыг эрмэлздэг. Гэтэл өнөөдөр улс төрийнхөө өрсөлдөгчдийг, Монголчуудын төлөө гэж дуугарсан зөв бодолтой хүмүүсийг мөрдөн мөшгөх, хэлмэгдүүлэх үйл ажиллагаа нийтийг хамарсан үзэгдэл боллоо. Энэ үйл ажиллагаанд шударга үнэнийг бататгах хуулийн байгууллага татагдаж орж байгаад харамсч байна. Шүүх, прокурор, цагдаа, АТГ бол өнөөдөр Монгол Улсын иргэдийг хэлмэгдүүлдэг арга хэрэгсэлтэй болж хувирсан нь аймшигтай юм.

Монголчууд айдас дунд амьдарч байна. Тиймээс өөрийнхөө үзэл бодлыг хамгаалж, ард түмний өмчийг ашиглах гэж, шударга үйл ажиллагаатай намын удирдагчдыг айлгах арга зам руу орж байгааг бид зөвөөр ойлгох ёстой.

-Тэгэхээр улс төрийн өрсөлдөгч чинь үүнийг хийсэн гэж харж байна уу?
-Нийгмийн айдсаар дарангуйлдаг хүнийг, бусдыг, улс төрийн бусад намыг айдсаар дарангуйлдаг энэ байдлыг бид таслан зогсоох хэрэгтэй.

Ард түмний төлөө чин үнэн үгээ хэлж байгаа улс төрчдийг яаж хэлмэгдүүлдэгийг бид  амьдралаараа харсан. Н.Энхбаяр "Оюутолгой", "Тавантолгой"-г ард түмэндээ өгч өмчлүүлэх ёстой, тэр ашгийг ард түмэн авах ёстой гэж хэлснээрээ хэлмэгдсэн. Гэтэл одоо бүр нийтийг хамарсан айдас хүйтэс Монголчуудыг нөмөрч байна. Өнөөдөр Монголд хууль ёс, шударга ёс алга. Бид үндсэн хуулиараа хүний эрх, эрх чөлөөг тунхагласан ардчилсан орон. Үндсэн хуулийн 16-р зүйлд хүний салшгүй эрхүүдийг заасан байгаа. Түүнд өөрийгөө өмгөөлөх, өмгөөлөгчтэй байхыг ч тусгасан.
Гэтэл бидний авсан мэдээллээр Г.Шийлэгдамба нарын хүмүүсийг урд шөнөжингөө ямар ч өмгөөлөгчгүйгээр  дарамталж мэдүүлэг авсан. Энэ мэтээрээ өнөөдөр бидний тунхаглаад байгаа Үндсэн хууль, Хүний эрх зөрчигдөж байна.

-Улс төрийн хэлмэгдүүлэлт гэдгээ тодорхой тайлбарлахгүй юу?

-Ер нь АТГ-ын энэ үйл ажиллагаа яагаад өчигдөр болов.

Нэгдүгээрт, өнөөгийн эрх барьж байгаа зарим хүмүүс, бүлэглэл өөрсдийн шалгагдаж байгаа хүмүүсээсээ олны анхаарлыг хөндийрүүлэхийн тулд зориудын арга хэмжээ зохиосон байхыг үгүйсгэхгүй.

Хоёрдугаарт, өчигдөр МАН, МАХН-ын удирдлагад олон ахмад өргөн барих бичгээ гардуулсан. Ер нь ирэх сонгуульд хамтарч орохын чухлыг тэмдэглэсэн уулзалт болсон. Энэ уулзалт олон улс төрчдийн анхаарлыг татаж түгшээсэн байж магадгүй. Ийм учраас энэ асуудалд сэтгэл түгшиж, дараагийн бохир улс төрөө бодсон улс төрийн хүчин хуулийн байгууллагыг ийм үйл ажиллагаа явуулахад татан оруулсан байж болзошгүй гэдэг сэжиг бидэнд байгаа.

Тэгэхээр цэвэр улс төр гэдэг өнөөдөр Монголд байхгүй болсон байна. Шударга өрсөлдөөнгүйгээр дарах шахах үйл ажиллагаа өнөөдөр газар авсан.

Д.Ундрах /24tsag.mn/