Эрүүл мэнд, спортын сайд, МАХН-ын Ерөнхий нарийн бичгийн дарга Г.Шийлэгдамбыг лхагва гаригийн орой авлигын хэргээр баривчилсан талаар манай сайт цаг алдалгүй мэдээлсэн. АТГ-ын 30 гаруй байцаагч түүний өрөөнд нэгжлэг хийж, гүйцэтгэх ажиллагаа явуулсан талаар МАХН-ынхан онцлоод байгаа.  Түүнийг урьдчилан хорих 461 дүгээр ангид саатуулаад байгаа бөгөөд хамт байцаагдсан нэр бүхий таван иргэнийг одоогоор гадуур байцааж байгаа юм.

МАХН-ын зүгээс Г.Шийлэгдамбыг ямар ч өмгөөлөгчгүйгээр байцааж эхэлсэн гэдгийг хариуцлагатайгаар мэдэгдэж улс төрийн явуулга, хэлмэгдүүлэлт мэтээр тайлбарлав.

Мөн сонгууль, хуйвалдаан, улс төрийн сөрөг хүчнээ дарах гэсэн оролдлого мэтээр  олон нийтэд мэдээлэл түгээгээд байгаа билээ.

Цаашлаад МАХН-аас өчигдөр хэвлэлийн хурал зарлаж “Г.Шийлэгдамба сайдыг саатуулсан захиалагчийг нь хэлье. АТГ-ын даргыг хэн томилдог вэ гэдгийг бод” гэсэн нь МАХН-ынхан Ерөнхийлөгчийг хардаж байгаа гэдэг нь ойлгомжтой болоод байна.

Юутай ч Г.Шийлэгдамбын асуудлаар намынх нь дарга Н.Энхбаяр ч байр сууриа илэрхийлээд авчээ.

Тус намынхны зүгээс  “Баривчилгаа хэзээ нэгэн цагт болох байсан. Харин хэнийг, хэзээ барихыг бид мэдээгүй. Гэвч Г.Шийлэгдамбыг баривчилснаар энэ заналхийлэл ил боллоо. Шүүх, прокурор, цагдаа, АТГ Монгол Улсын иргэдийг хэлмэгдүүлдэг арга хэрэгсэлтэй болж хувирсан. Тэд улс төрийн захиалгаар гүтгэлэг, хэлмэгдүүлэлтийг явуулж байна” гэдэг зүйл ярьж байв.

Ийн Г.Шийлэгдбамыг баривчилсан нь Ерөнхийлөгчийн хийж буй ажил, эсвэл өөрсдийн шалгагдаж байгаа хүнээсээ олон нийтийн анхаарлыг сарниулах гэсэн оролдлого гэдгийг МАХН-ынхан дуу нэгтэйгээр онцлоод байгаа юм.

Д.Дуулим