УИХ-ын чуулганы хуралдаанаар Монгол Улсын 2016 оны төсвийн тухай, Хүний хөгжил сангийн 2016 оны төсвийн тухай, Нийгмийн даатгалын сангийн 2016 оны төсвийн тухай хуулийн төслүүдийн хоёр дахь хэлэлцүүлгийг үргэлжлүүлэн хийж байна. Тодруулбал, урсгал зардал бууруулах асуудлыг үргэлжлүүлэн хэлэлцэж байх үеэр МАН-ын бүлэг ажлын тав хоногийн завсарлага авахыг хүсэв.

Тус бүлгийн дарга С.Бямбацогт "Төсвийн талаар МАН-ын бүлэг тодорхой саналаа тусгасан. Тэр талаараа ярьж саналаа хэлэх боломжгүй байна. Цөөнхөөр үг хэлүүлэхгүй. Тайлбарыг нь хийлгэхгүй байна. Тиймээс тав хоногийн завсарлага авъя" гэлээ.

Харин УИХ-ын дарга З.Энхболд "Төсвийн тухай хуулийг энэ сарын 15-ны дотор батлах ёстой. Өнөөдөр 11-ны өдөр. Маргааш амралтын өдөр. Тэгэхээр 15-нд амжихгүй болох гээд байна" гэлээ.

УИХ-ын дэд дарга Р.Гончигдорж "Хуулиа баталж, 15-ы өдөр Төсвийг батлах үүрэгтэй. Ажлыг бүтээхгүй бол ард түмэн яаж амьдрах юм. МАН-ынхан сэтгэлийн хөөрлөөр хандах хэрэггүй. МАН-ын бүлэгт завсарлага өгөх шаардлагагүй" гэв.

УИХ-ын дарга З.Энхболд Төсвийг 15-ны өдрийн дотор баталж дуусгах саналыг гаргаж гишүүдээр санал хураалгах гэхэд гишүүдийн ирц бүрдсэнгүй.

Ингээд МАН-ын бүлэгт нэг цагийн завсарлага өгөв.

Т.Хулан