ХҮН-аас мэдээлэл хийлээ. Өнгөрсөн долоо хоногт УИХ-ын гишүүн, Үндсэн хуульд өөрчлөлт оруулах ажлын хэсгийн ахлагч Н.Батбаяр Үндсэн хуульд өөрчлөлт оруулах хуулийн төслийг УИХ-ын даргад өргөн барьсан. 

Тэгвэл ХҮН-аас Үндсэн хуульд өөрчлөлт оруулах төслийг боловсруулах явцаас эхлэн иргэдийн санаа бодлыг сонсох ёстой байсан гэдгийг онцлов. Тодруулбал, ард иргэдээс саналыг нь авалгүйгээр Үндсэн хуульд дур мэдэн өөрчлөлт оруулж түүнийгээ хэлэлцүүлэх гэж байгааг тус намынхан эсэргүүцэж байгаа аж. Тиймээс энэхүү үйл явцыг эсэргүүцсэн Ард нийтийн хурлыг энэ сарын 16-ны 10.00 цагаас Монголын үйлдвэрчний соёлын төв ордны бага танхимд зохион байгуулахаар болжээ. Тус намынхны хувьд Үндсэн хуульд өөрчлөлт оруулж болно. Гэхдээ маш болгоомжтой хандах ёстой гэж үзэж байгаа аж.

ХҮН нь Үндсэн хуульд өөрчлөлт оруулахтай холбоотойгоор хэд, хэдэн удаа УИХ-д шаардлага хүргүүлж, жагсаал хүртэл зохион байгуулж байсан. Харин тэдний шаардлаганд эрх баригчид ганц ч хариу ирүүлээгүй байна. 

Тус намын удирдах зөвлөлийн гишүүн хуульч Д.Үүрцайх “Цөөн хэдэн гишүүн нийлж сууж байгаад дур мэдэн Үндсэн хуульд өөрчлөлт оруулжээ. Түүнийгээ ард түмнээр дэмжүүлж УИХ-аар хэлэлцүүлэх гэж байна. Тэдний хийх гэж буй өөрчлөлтөөр Засгийн газрын бие даасан байдлыг багасгаж УИХ-ын эрх мэдлийг нэмэгдүүлнэ. Өөрөө хэлбэл, парламентийг хэт их эрх мэдэлтэй болгох гэж байна. Ерөнхийлөгчийн эрх мэдлүүдийг хасаж, олонхийн дарангуйлал болгох гэж байна. Хэсэг бүлэг хүмүүс зохисгүй өөрчлөлт хийх нь маш хор, хохиролтой. Үндэсний аюулгүй байдалд сөргөөр нөлөөлнө. Ард иргэдээсээ асууж байгаа арга барил нь ч булхайтай байна" гэлээ.

Мөн Үндсэн хуульд өөрчлөлт оруулах энэ удаагийн үйлдэл нь Үндсэн хуульд нэмэлт өөрчлөлт оруулах журмын тухай хуулийг бүхэлд нь зөрчиж байна. Энэ  нь Төрийн эсрэг гэмт хэрэг болж буй үйлдэл гэлээ.

Үндсэн хуульд өөрчлөлт оруулах хуулийн төслийг боловсруулахдаа ард иргэдээс асуугаад дараа нь УИХ-аар хэлэлцээд дахин ард нийтээс асуугаад  хэлэлцэх ёстой гэж тус намынхан үзэж байгаа аж.

Т.Энхэлээ