УИХ-ын гишүүн Г.Уянга бие даагчдын зөвлөлтэй хамтран мэдээлэл хийлээ. Тэрээр "Таван толгой" компанийн үйлдвэрчний эвлэлийн хорооны дарга С.Эрдэнэ өөрийгөө шатаасан үйлдэлд Засгийн газар хариуцлага хүлээх ёстой гэж мэдэгдлээ. Тэрбээр "Таван толгой"-н 200 ажилтныг халах гэрээг 2011 онд МАНАН-ийн Засгийн газар хийсэн гэв. 

Тэрээр “Таван толгойн ажилчид асуудлаа яриад маш их удсан. УИХ-ын дарга, гишүүд, Аюулгүйн зөвлөлд байж болох бүх хэлбэрээр хандсан. Гэтэл түүнийг тоогоогүй өдий хүрсэн. “Эрдэнэс Таван толгой”-н ажилчид ажлын байраа л хадгалж үлдэх гэсэн. “Эрдэнэс Таван толгой” “МакМахон” компанийн охин компани болох TTJVCO компаниар Зүүн Цанхиас нүүрсээ олборлуулах гэрээ 2011 онд хийсэн. Гэтэл тэд Баруун Цанхиас хоёр дахин үнэтэй олборлолт хийгээд байсан. Монгол Улсад алдагдалтай байсан учраас 2014 онд УИХ-ын ажлын хэсэг шалгаад өндөр өртөгтэй олборлож болохгүй, олборлолтын өртгөө хямдруул гэдэг үүрэг өгсөн. Тэгсэн TTJVCO компани “олборлолтын өртгөө бууруулах юм бол бид танай ажилчдаар олборлуулалхгүй. Хятад ажилчдаа оруулж ирж, олборлуулна” гэсэн. Тэгэхээр эдгээр ажилчин өөрсдийнхөө төлөө тэмцэх нь зүй ёсны хэрэг. Тэд төрийн өмчид компанид ажиллаж байгаа төрийн ажилчид. Бид “Ер нь яагаад заавал TTJVCO компаниар олборлуулах ёстой юм бэ” гэж асуусан. 2011 онд МАНАН-гийн Засгийн газар TTJVCO компаниар 2017 он хүртэл олборлолт хийлгэнэ гээд гэрээ байгуулчихсан. Хэрвээ гэрээгээ цуцлавал бид 100 сая.ам долларын өрөнд орно” гэсэн. Ийм алдагдалтай гэрээ хийж, алдагдалтай нүүрс олборлолт хийлгэж, төрийг ийм олон зуун ам.долларын алдагдал оруулах гэрээг МАНАН хийсэн. Тэгэхээр энэ хэрэгт гарцаагүй Засгийн газар хариуцлага хүлээх ёстой. Б.Батбилэгийг ажлаас нь халаад бамбай хийгээд энэ асуудлыг хаах гэж байна. Б.Батбилэгээр бамбай хийгээд ард нь хариуцлага хүлээх ёстой хүмүүс нь үлдэж болохгүй. Уул уурхайн. Сайд Р.Жигжидийг огцруулах ёстой ч огцроод ч багадна. С.Баярцогт ТУЗ-ийг тэргүүлдгийнхээ хувьд огцрох ёстой гэхдээ мөн л багадна. Засгийн газар энэ хариуцлагыг хүлээх ёстой. Засгийн газрыг огрцуулах маш том хүндэтгэх шалтгаан бол энэ үйл явдал мөн гэж бодож байна” гэв.

 Г.Уянга гишүүн өнгөрсөн тавдугаар сараас Ерөнхий сайдыг огцруулах бичигт гишүүдийн гарын үсгийг цуглуулж эхэлсэн билээ. Одоогоор хэдэн гишүүн гарын үсэг зураад байна вэ гэх асуултад тэрээр “Хараахан бүрдээгүй байна. Бүрдмэгц би хэвлэлийн хурал хийнэ. “Шударга ёс эвсэл”-ийн бүлгийн хурал дээр зарчмын байр сууриа хамгаалах ёстой гэсэн шаардлага тавих гэж байна. Хамгийн түрүүнд энэ гарын үсгийг бүрдүүлэх субект нь “Шударга ёс эвсэл” байх ёстой. Би энэ гарын үсгийг бүрдүүлэх гэж хөөцөлдөөд яваад байгаа зүйл байхгүй. Асуудлыг л ойлгуулах гэж гишүүдтэй уулзаж ярьж байгаа зүйл бий. Үүнийг ойлгосон, Оюутолгойгоо авч үлдье гэж санаа зовж байгаа гишүүн өнөөдрийн парламентад 20 хүрэхгүй л байна. Энэ бол том эмгэнэл” гэлээ.