АН-ын бүлгийн хуралдаанаар хэлэлцсэн асуудлуудын талаар бүлгийн дарга Гарамгайбаатар, С.Одонтуяа нар мэдээлэл хийлээ.

АН-ын бүлэг Эрүүл мэндийн тусламж үйлчилгээний тухай болон холбогдох хуулийн төслийг бүлгийн хурлаар хэлэлцэх төлөвлөгөөтэй байжээ. Гэвч ЭМС-ын сайдыг томилоогүй, төрийн нарийн бичгийн дарга нь байцаагдаж байгаа учраас энэ хуулийн төслийг хойшлуулсан байна.

АН бүлгийн хуралд УИХ-ын дарга З.Энхболд, Ерөнхий сайд Ч.Сайханбилэг нар мэдээлэл хийсэн. Энэ үеэр Үндсэн хуульд нэмэлт өөрчлөлт оруулах талаар нэлээд олон гишүүн санал асуулга тавьжээ.

Түүнчлэн Үндсэн хуульд нэмэлт өөрчлөлт оруулах тухай хуулийн төсөл, Монгол улсын хөгжлийн урт хугацааны бодлогын баримт бичгийн талаар,  Ард түмний санал асуулгын тухай хуульд нэмэлт өөрчлөлт оруулах тухай хэлэлцэж, санал асуулга тавьсан байна.  Ард түмний санал асуулгын тухай хуульд нэмэлт өөрчлөлт оруулж, арваннэгдүгээр сарын 26-нд санал асуулга авч амжих эсэх асуудалд гишүүд байр сууриа илэрхийлжээ.        

Үүний дараа сэтгүүлчдийн сонирхсон асуултад хариуллаа.

-Үндсэн хуульд нэмэлт өөрчлөлт оруулах асуудлаар ард нийтийн санал асуулга явуулах гэж байгаа.  Арваннэгдүгээр сарын 26-н гэхэд амжих уу? 

-Энэ долоо хоногт УИХ, байнгын хороодын хэлэлцэх асуудалд ард нийтийн санал асуулгын тухай УИХ-ыг тогтоолын төсөл орсон байгаа. Тэгэхээр маргааш төрийн байгуулалтын байнгын хороогоор энэ асуудал хэлэлцэгдэнэ. Энэ үеэр гишүүд тодорхой байр сууриа илэрхийлэх байх.

- Үүний дараа УИХ-ын чуулганаар хэлэлцэх эсэх асуудлыг шийднэ. Хугацааг юу гэж үзсэн бэ? 

-Хугацааны хувьд бол одоогоор тодорхойгүй байна. Учир нь арваннэгдүгээр сарын 26-нд амжихгүй болж байх шиг байна. Тиймээс энэ асуудлыг эргэж сайтар ярих ёстой гэсэн шийдэлд хүрсэн.

-Үндсэн хуулийн нэмэлт өөрчлөлтийг хийхдээ ямар хүрээнд асуудлыг авч үзэх боломж байна гэсэн үг вэ?

-Үндсэн хуулийн өөрчлөлтөд гишүүд нэгдмэл байр суурьт хүрээгүй байгаа.  Хамгийн маргаантай байгаа асуудал бол гишүүдийн тоог нэмэх, анхан шатны нэгж дээр засаг дарга томилох эсэх асуудал . Үүн дээр нилээд маргаантай байх шиг байна. Ерөнхийлөгчийг сонгох асуудал дээр нилээд зарчмын зөрүүтэй байр суурийг барьж байна. Бусад асуудал дээр ойролцоо саналтай байгаа нь харагдаж байгаа. Тиймээс тодорхой шийдвэр гаргаагүй.

-Сонгуулийн хуулийн төслүүдийг энэ долоо хоногт хэлэлцэхээр төлөвлөсөн байна. Үүнтэй холбоотой дүгнэлт гарсан уу?

-Сонгуулийн хуультай холбоотой асуудлаар бүлэг өнөөдөр яриагүй. Өнгөрсөн долоо хоногт "Шударга Ёс" эвслийнхэн хуульд өөрчлөлт оруулах тухай хуулийн төслийг өргөн барьсан байсан. Одоогоор дөрвөн төсөл чуулганд орж ирж байгаа. Тиймээс тухайн байнгын хороодоор хэлэлцээд явахад ажлын хэсэг байгуулагдана гэж бодож байна.

Т.Энхэлээ