Үндсэн хуульд өөрчлөлт оруулах асуудлыг УИХ-аар хэлэлцэж байна. Н.Батбаяр гишүүний ахалсан ажлын хэсгийнхэн Үндсэн хуулийн өөрчлөлтөө зөв, бас дэмжих эсэхийг ард түмнээс асууж байж шийднэ. Ард нийтийн санал асуулгыг энэ сарын 26-ны өдөр хийнэ гэж төлөвлөсөн ч хугацаандаа амжихгүй болсон тул хойшлуулсан гэх мэдээлэл байгаа юм. УИХ дахь сөрөг хүчин болох МАН-ынхан Үндсэн хуульд өөрчлөлт оруулахыг эрс эсэргүүцэж байгаа. Өнөөдөр хүчин төгөлдөр үйлчилж буй Эцэг хууль буюу Үндсэн хуулийг өөрчлөх шаардлагатай, цаг нь болсон гэж зарим улс төрчид үзэж буй. Харин нөгөө хэсэг нь тус хуулинд гар хүрэх цаг нь өнөөдөр биш гэж хэрэлдсээр хоёр долоо хоногийг үдэж байна.

Мөн зарим хэсэг нь өнөөдрийн оруулах өөрчлөлт нь улс төрчдөд дураараа дургих боломжийг нээх болно хэмээн эсэргүүцэж байгаа юм.

Монгол Улсын анхны ардчилсан Үндсэн хууль 1992 онд батлагдсан. Өнгөрсөн 23 жилийн хугацаанд Ерөнхийлөгчийн болон УИХ, орон нутгийн ИТХ-ын сонгууль тус бүр зургаан удаа зохион байгуулагдсан. Үндсэн хуульд заасны дагуу Засгийн газар 13 удаа байгуулагдан ажиллажээ. Үндсэн хууль батлагдсанаас хойш УИХ 2000 оны арванхоёрдугаар сарын 14-ний өдөр долоон нэмэлт, өөрчлөлт оруулсан юм.

Дордуулсан долоон өөрчлөлт гэгдэж багагүй шүүмжлэл дагуулсан энэхүү нэмэлт, өөрчлөлтөөс хойш ийнхүү 14 жилийн дараа Үндсэн хуулийг дахин өөрчлөх гэж байгаа нь энэ. Гэхдээ Үндсэн хуульд нэмэлт, өөрчлөлт оруулах зайлшгүй шаардлага бий болсон гэдгийг УИХ хоёр жилийн өмнө хүлээн зөвшөөрч, дүгнэлт гаргасан билээ. Харин өөрчлөх цаг нь мөн үү, одоогийн УИХ-д ийм чадамж бий юу гэдэг нь олны анхаарлыг татаж байгаа юм.

Үндсэн хууль оруулах нэмэлт, өөрчлөлтийн төсөлд УИХ-ын гишүүдийн тоог 99 болгох, УИХ, Засгийн газрын бүрэн эрхийг хугацааг таван жил, Ерөнхийлөгчийн бүрэн эрхийн хугацааг зургаан жил, бүх шатны Засаг дарга нарын бүрэн эрхийн хугацааг таван жил болгох, ИТХ-ын сонгуульд улс төрийн нам нэр дэвшүүлэхгүй байх, Үндсэн хуулийн Цэцийг бүрдүүлэх, Улсын ерөнхий прокурорыг томилоход Засгийн газрын оролцоог бий болгох зэрэг өөрчлөлтүүдийг тусгажээ.

Манай сайт өнөөдөр хүчин төгөлдөр үйлчилж буй Үндсэн хууль болон удахгүй оруулах гэж буй өөрчлөлтийг харьцуулан хүргэж байна. Үндсэн хууль яаж өөрчлөгдөхийг доорхоос харна уу.

Өнөөдөр хүчин төгөлдөр мөрдөгдөж буй Үндсэн хуулийг үргэлжлүүлэн энд дарж үзнэ үү

Үндсэн хуульд оруулахаар санал болгож буй өөрчлөлтүүдийг энд дарж үзнэ үү

Т.Энхэлээ