УИХ-ын Нийгмийн бодлого, боловсрол, соёл, шинжлэх ухааны байнгын хорооны хуралдаанаар Хамтын тэтгэврийн тухай хуулийн төслийг хэлэлцэж байна. Уг хууль батлагдвал 10 ба түүнээс дээш хамтран амьдарсан түүнийгээ баталгаажуулсан хосуудын нэг нь нас барахад үлдсэн нь тэтгэврийнх нь мөнгийг авах болон захиран зарцуулах эрхтэй болох юм. Хамтын тэтгэврийн тухай хуулийн төслийг УИХ хаврын чуулганаараа хэлэлцэн, хэлэлцэх эсэхийг дэмжсэн бөгөөд дээрх байнгын хороогоор анхны хэлэлцүүлгийг хийх ёстой юм. 

Хуралдааны эхэнд УИХ дахь МАН-ын бүлгийн гишүүд Малчдын тэтгэврийн насыг урагшлуулах тухай хуулийн төслийг байнгын хороогоор хэлэлцэх шаардлага тавьж, Хамтын тэтгэврийн тухай хуулийн төслийн хэлэлцүүлгийг хойшлуулахыг шаардсан юм. 

Байнгын хорооны хуралдаан эхлэнгүүт УИХ дахь МАН-ын бүлгийн дэд дарга Д.Хаянхярваа Хамтын тэтгэврийн тухай хуулийн төслөөр завсарлага авах санал гаргалаа. Гэвч хурал даргалагч УИХ-ын гишүүн Д.Батцогт “Танай бүлэг өмнө нь энэ хуулийн төсөл дээр ажлын тав хоногийн завсарлага авсан тул дахин завсарлага өгөх боломжгүй” гэдгээ мэдэгдсэн юм. 

Гэтэл МАН-ын бүлгийн болох УИХ-ын гишүүн Ч.Хүрэлбаатар, Н.Номтойбаяр, Д.Хаянхярваа нар хуралдааныг орхиж гарсан юм. Малчдын тэтгэврийн насыг урагшлуулах тухай хуулийн төслийг 2 жилийн өмнө санаачлан боловсруулж УИХ-д өргөн мэдүүлсэн ч хэлэлцүүлэгт оруулаагүй байна. Эхлээд энэ хуулийг хэлэлцэх ёстой. Дараа нь Хамтын тэтгэврийн хуулийг хэлэлцэх хэрэгтэй гэх саналыг МАН-ын бүлгээс гаргаж байгаа юм. 

Т.Энхэлээ