Долдугаар сарын нэгний хэрэгт буруутгагдаад буй цагдаагийн экс дарга нарыг шүүх хурал дөнгөж сая дуусч, ялын тогтоолыг танилцууллаа. Улсын яллагчийн зүгээс Ч.Амарболд, Ш.Батсүх, Г.Ганбаатар, О.Зоригт нарт 8-9 жил хорих ял оноохоор төлөвлөснөө өчигдрийн шүүх хурлаар танилцуулсан. Гэвч 23.00 цаг болсон учраас шүүх хурлыг түр завсарлаж, өнөөдөр 11.00 цагаас хойш үргэлжлүүлэн хэлэлцсэн юм. Бүтэн хоёр өдөр хуралдсаны эцэст ЦЕГ-ын даргын үүрэг гүйцэтгэгч, хошууч генерал Ч.Амарболдод 6.6 жил, Эргүүл хамгаалалтын газрын дарга асан, цагдаагийн хурандаа Ш.Батсүхэд мөн 6,6 жил, Нийслэлийн цагдаагийн газрын дарга асан, хурандаа О.Зоригт 5,6 жил, Нийслэлийн цагдаагийн газрын Хэв журмын хэлтсийн дарга асан, хурандаа Г.Ганбаатарт хоёр жилийн ялыг жирийн дэглэмтэй хорих ангид биечлэн эдлүүлэхээр болов.
Өршөөлийн хуульд хамруулсанаар Ч.Амарболд, Ш.Батсүх нар 3.6, О.Зоригт 2.6 жилийг хорих ялыг биечлэн эдлүүлэхээр шийдвэрлэсэн юм. Харин НЦГ-ын Хэв журмын хэлтсийн дарга асан, цагдаагийн дэд хурандаа Г.Ганбаатар оноосон хоёр жилийн ялыг өршөөлийн хуульд хамруулан суллахаар болжээ.
Хуралд даргалагч шүүгчээр Ч.Хосбаяр, шүүгчээр С.Алдар, С.Оюунчимэг, улсын яллагчаар С.Хишигжаргал, Ц.Уртнасан, хохирогчдын өмгөөлөгчөөр О.Баасанхүү, шүүгдэгч Ч.Амарболдын өмгөөлөгчөөр Ж.Яримпил, Ш.Батсүхийн өмгөөлөгчөөр М.Алтан-Өлзий, Г.Ганбаатарын өмгөөлөгчөөр Т.Мөнхдэлгэр, О.Зоригт өмгөөлөгчгүй оролцлоо.
Б.Чимэг
