Шүүгч, шүүхийн Ёсзүйн хорооны гишүүдийг Ерөнхийлөгчийн зарлигаар томилдог. Тэгвэл өнгөрсөн сард Ерөнхийлөгч Ц.Элбэгдорж шүүхийн Ёсзүйн хорооны гишүүнийг томилохдоо хууль зөрчин томилсон талаар эх сурвалж мэдээлсэн.

Өөрөөр  хэлбэл, ШЕЗ-өөс давж заалдах шатны Ёсзүйн хорооны гишүүнд С.Нямжавын нэрийг Ерөнхийлөгчид өргөн барьсан аж.

Гэтэл Ерөнхийлөгч Ц.Элбэгдорж сонгон шалгаруулалтад тэнцэж, нэрийг нь өргөн барьсан С.Нямжавыг бус шалгаруулалтад оролцоогүй өөр хүнийг шүүхийн Ёсзүйн хорооны гишүүнээр томилсон. Тодруулбал, Ерөнхийлөгч өнгөрсөн аравдугаар сарын 29-нд зарлиг гарган, шүүхийн Ёсзүйн хорооны гишүүнээр Б.Үнэнбатыг томилсон талаар эх сурвалж мэдээлсэн.

Тэгвэл дөнгөж сая энэхүү мэдээллийг Шүүхийн ёсзүйн хорооноос үгүйсгэлээ.

"Шүүхийн Ёс зүйн хорооны гишүүнээр Хууль зүйн асуудал эрхэлсэн төрийн захиргааны төв байгууллагаас нэр дэвшин ажиллаж байсан О.Алтангэрэл өөрийн хүсэлтээр чөлөөлөгдөж түүний орны суудалд Хууль зүйн яам Бодлогын хэрэгжилтийг зохицуулах газрын дарга Б.Үнэнбатын нэрийг дэвшүүлсэнийг Ерөнхийлөгч томилох бүрэн эрхээ хэрэгжүүлсэн.

Харин Давж заалдах шатны шүүхийн шүүгчдийн зөвлөгөөнөөс Д.Пунцаг нэр дэвшин ажиллаж байгаад нас барсан тул түүний суудалд С.Нямжав, А.Доржготов, П.Цэцгээ, Х.Сэлэнгэ нар нэр дэвшиж, С.Нямжав олонхын санал авсан байх тул Шүүхийн ёс зүйн хорооны гишүүнээр томилуулахаар Ерөнхийлөгчид өргөн мэдүүлээд байна. Ерөнхийлөгч хууль зөрчсөн шийдвэр гараагүй болно" гэлээ.

Д.Дуулим