Аж үйлдвэрийн сайд Д.Эрдэнэбатын Европын зарим улс оронд хийж буй айлчлал өнөөдөр /2015.11.20/ Итали улсад үргэлжилж байна.

Тэрбээр өчигдөр /2015.11.19/ Монгол Улсын Ерөнхийлөгч Ц.Элбэгдоржийн Франц улсад хийсэн айлчлалын бүрэлдэхүүнд ажиллаж,  “Франц-Монголын бизнес форум”-д оролцож үг хэллээ. Монгол – Францын бизнес уулзалтад уул уурхай,  барилга байгууламж, эрчим хүч, аж үйлдвэр, технологийн болон бусад салбарыг хамарсан хоёр улсын нийт 100  гаруй бизнес эрхлэгч оролцож, санал бодлоо солилцлоо.

Хоёр улсын бизнес эрхлэгчдийн харилцан санал солилцож, найдвартай түншээ эрэлхийлсэн тус уулзалтыг нээж, Монгол Улсын Ерөнхийлөгч Ц.Элбэгдорж үг  хэлсэн юм. Монгол Улсын Ерөнхийлөгч Ц.Элбэгдорж  хоёр улсын дипломат харилцаа  үүссэний 50  жилийн ой болж өнгөрснийг  тэмдэглээд Франц улсад  болсон гэмт халдлагын дараа ирж буй анхны Ерөнхийлөгч болохоо дурдаад хоёр улс цаашид бүх салбарт хамтын ажиллагаагаа өргөжүүлэх ажиллах боломжтой. Тэр дундаа хувийн хэвшил бизнес эрхлэгчдийн хамтын ажиллагаа улам бүр  тэлэх боломж байгааг форумыг нээж хэлсэн үгэндээ онцоллоо. Үүний дараа Аж үйлдвэрийн сайд Д.Эрдэнэбат хоёр улсын бизнес эрхлэгчдэд хандаж үг хэлсэн юм.

 Аж үйлдвэрийн сайд хэлсэн үгэндээ Монгол Улс Франц улстай эдийн засгийн хамтын ажиллагааны хүрээнд цаашид ямар ажил хийх,   монголын эдийн засгийн нөхцөл байдал, аж үйлдвэрийн нөхцөл байдал монголын сонирхол хаана байна вэ гэдгийг илэрхийлсэн. Хэдийгээр уул уурхайн ашигт малтмал үнийн уналтаас шалтгаалаад  эдийн  засгийн түр зуурын хүндрэл үүссэн гадаадын шууд хөрөнгө оруулалт зогссон байгаа энэ үед монголчууд “амьдарч” байгаа юм. Монголчууд амьдарч байна гэдэг бол өөрөө өөрийгөө  тэжээдэг болж,  худалдааны сэтгэлгээнээс үйлдвэрийн сэтгэлгээ рүү шилжсэн орон болсон гэдгийг бидний өнөөдөр амьдарч байгаа чадавхи  харуулж байгааг онцоллоо. Түүнчлэн тэрбээр Монголчууд бид уул уурхай шүтсэн байдлаасаа гарч, өөрсдийнхөө баялгийг нэмүү өртөг шингээсэн баялаг болгоход анхаарч байгаа гэдгээ илэрхийлж байлаа. Учир нь Монгол Улс саяхан Төрөөс аж үйлдвэрийн талаар баримтлах бодлогоо баталсан. Монгол Улсын Ерөнхийлөгчийн дэмжлэгээр Үйлдвэрлэлийг дэмжих тухай хуулийг баталсан.  Тус хуулиараа экспортын баримжаатай үндэсний компаниудыг бодлогоор дэмжинэ. Энэ хүрээнд Монгол улсад хариуцлагатай үйлдвэр эрхлэгчид, бизнес эрхлэгчид олон буй болж байгаа. Энэ ажил эрчимжиж байгаа. Бидний хандлага өөрчлөгдөж байгаа гэдгийг тэрбээр илэрхийлсэн юм.

 Монголчууд саалиа бэлдэхээр саваа бэлд гэж  ярьдаг. Сааль хэмээх уул уурхай, хөдөө аж ахуйн түүхий эд арвин байгаа боловсруулах баяжлуулах түгээх арга туршлага дутмаг байгаа гэдгээ ч ойлгодог. Үүнийг  нэмүү өртөг шингэсэн экспортын бараа  бүтээгдэхүүн болгоход сайн түнш бидэнд хэрэгтэй. Түүнчлэн “Монголчууд хийж, бүтээх хөгжлийн заагт ирсэн” хэмээн онцлов.

 Харин Форумын үеэр  монголоос оролцож буй бизнес эрхлэгчдийн хувьд өөрсдийн явуулж буй бизнесээ өргөжүүлэн хөгжүүлэх сайн түншийг олох үр дүн бүхий форум болж байгаа болохыг хэлж байсан юм. Францын бизнес эрхлэгчдийн зүгээс мөн Монголчуудтай хамтарч ажиллахдаа хөрөнгө оруулагч гэхээсээ илүү   бизнест хамтран ажиллах сайн түншийн харилцаатай байхыг хүсч байна. ОЛон шинэ төслийг хамтран амжилттай хэрэгжүүлэхийг хүсч байна. Хамтарч ажиллах боломж хайж боломжийг эрэлхийлэн хүнд цаг үед сэтгэл санааны дэмжлэг өгөхөөр ирсэн монгол нөхөддөө баярлаж буйгаа  илэрхийлж байсан юм.

Энэхүү бизнес форумын үеэр Аж үйлдвэрийн сайд хэд,  хэдэн компаниудыг хүлээн авч уулзсан юм.

Тэрбээр Бүгд найрамдах Чех улсад ажиллаж байна.