Ерөнхий сайд асан, УИХ-ын гишүүн С.Баяр энэ жилийн сонгуульд нэр дэвшээгүйд хүмүүс янз бүрийн тайлбар хийж байсан. С.Баярыг МАН-ын жагсаалтад дээгүүр бичигдэх хүн хэмээн үнэлдэг тул түүнийг нэр дэвших байх гэсэн хүлээлт үүсээд байсан. Тэрбээр сонгуульд нэр дэвшигчдийг тодруулах намын Бага хуралдаа ч оролцоогүй билээ. Харин сонгуульд нэр дэвшээгүй, Бага хуралд оролцоогүй шалтгаан нь одоо тодорхой боллоо. Тэрбээр уржигдар буюу зургаадугаар сарын зургааны өдөр АНУ-д зүрхний хагалгаанд оржээ. Энэ хагалгаа нь бүтэн дөрвөн цаг үргэлжилсэн бөгөөд нэлээн хүнд хагалгаа болсон тухай ойрын эх сурвалжууд нь хэлж байгаа юм. Гэхдээ С.Баярын зүрхний хагалгаа амжилттай болсон байна. Хагалгаа хийлгээд хоёр хоног өнгөрч буй энэ хугацаанд түүний биеийн байдал тогтворжиж, хэвийн байдалдаа эргэн орж байгаа аж.

   Тэрбээр энэ жил УИХ-ын чуулганд тоотой хэдэн өдөр суусан бөгөөд намынхаа болон бусад гишүүдийн маргаан, хэл амнаас хол чимээгүйхэн байсан юм. С.Баяр энэ өвөл багагүй хугацаагаар АНУ-д эмчлүүлэхээр яваад эргэн ирээд байсан юм. Гэсэн ч биеийн байдал нь дээрдээгүй тул ийнхүү АНУ руу дахин явж, хагалгаанд оржээ. Тэрбээр биеийн байдлаа сайжрахаар Монголд ирнэ гэж төлөвлөж байгаа аж. Ямар ч байсан МАН-ын нөлөөтэй лидер тэрбээр УИХ-ын сонгуулийн санхал хураалтаас өмнө ирж, намынхандаа дэм болох хүсэлтэй байгаа гэнэ.