УИХ дахь МАН-ын бүлэг өнөөдрийн хуралдаанаараа гурван асуудлыг хэлэлцсэн байна. Тодруулбал, Үндсэн хуулийн цэцийн 14 дүгээр дүгнэлтийн тухай УИХ-ын тогтоолд Ерөнхийлөгчийн тавьсан хоригийн асуудлыг хэлэлцжээ. Ингээд Ерөнхийлөгчийн хоригийг хүлээж авах боломжгүй гэдэг шийдвэрийг гаргасан байна. Мөн Ерөнхий сайдын энэ долоо хоногт хийх мэдээлэл болон Хөгжлийн банкны санхүүжилттэй холбоотой асуудлыг хэлэлцэж шийдвэр гаргажээ.
Ерөнхийлөгчийн тавьсан хоригийн талаар тус бүлгийн дарга С.Бямбацогт ярихдаа “Үндсэн хуулийн цэцээс "Тойрог болон давж заалдах шатны шүүхийг аймгуудад төвлөрүүлсэн нь ард иргэдийг чирэгдүүлсэн, Үндсэн хуулийн зарим үзэл санаа, зарчимтай зөрчилдсөн байна" гэдэг шийдвэрийг гаргасан. Үндсэн хуулийн энэ шийдвэрийг өнгөрсөн долоо хоногт УИХ-аар хэлэлцэж хүлээн авсан ч Ерөнхийлөгч хориг тавьсан юм. Энэ нь УИХ-ын тогтоолд хориг тавьсан мэт харагдавч үндсэндээ Үндсэн хуулийн шийдвэрт хориг тавьсан шийдвэр боллоо. Үндсэн хуулийн цэцийн шийдвэрт өнгөрсөн 23 жилийн хугацаанд Ерөнхийлөгч анх удаа хориг тавьсан шийдвэр боллоо. Ингэж болохгүй ” гэв.
Бүлгийн хурлаар хэлэлцсэн дараагийн асуудал Нийгмийн даатгалын сангийн үйл ажиллагааны талаар Ерөнхий сайд Ч.Сайханбилэгийн энэ долоо хоногт хийх мэдээллийн талаар ярилцсан байна. Уг асуудлаар Ерөнхий сайдыг мэдээлэл өгөхийг хүсч МАН-ын бүлэг хүсэлт явуулсаны дагуу Ерөнхий сайд мэдээлэл хийх гэж байгаа аж.
Энэ талаар тус бүлгийн дэд дарга, УИХ-ын гишүүн Н.Номтойбаяр ярихдаа “Нийгмийн даатгалын санд 1 их наяд төгрөг төвлөрсөн байгаа. Энэ мөнгийг захиран зарцуулахдаа хууль зөрчсөн. Үүн дээр үндэслэж Ерөнхий сайдад асуулга тавьсан. Хариугаа энэ долоо хоногт сонсоно. Нэг их наяд төгрөгийн 40 орчим хувь нь арилжааны банкинд байршдаг. Харин 60 орчим хувь нь хадгаламж хэлбэрээр маш бага хүүтэйгээр байршина. Нийгмийн даатгалын сангийн мөнгийг арилжааны банкны хуулийн 9.1 заалтын дагуу банкуудад байршуулаад харилцан хүүгээ тохирох замаар тэтгэвэр, цалин, малчны зээлийн хүүг бууруулж иргэдийн нуруун дахь ачааг хөнгөлөх боломжтой юм. Салбар хариуцсан сайд С.Эрдэнэ манай шаардлагыг нааштайгаар хүлээн авч тэтгэврийн зээлийн хүүг бууруулах боломжтой” гэж мэдэгдсэн гэв.
Үүний дараа Хөгжлийн банкны шалгалт, түүнтэй холбоотойгоор МАН-ынхан бондын мөнгөнөөс хамгийн их зээл авсан гэх хэвлэлээр гарч байгаа мэдээллийн талаар тайлбар өглөө. МАН-ын бүлгийн дэд дарга Д.Хаянхярваа “Говь ХК 7.8 сая ширхэг хувьцаатай 16 мянган хувьцаа эзэмшигчтэй гэтэл МАН-ын дарга М.Энхболд 10 ширхэг хувьцаа эзэмшдэг 16 мянган хувьцаа эзэмшигчийн нэг. Гэтэл 10-хан ширхэг хувьцаатай хүнийг 10 тэрбум төгрөг авлаа гэж ташаа мэдээллэж байна. Тиймээс аль нэг нам гэлтгүй бүх асуудлыг ил тод ярих ёстой. Чингис бондоос яагаад 5.4 сая ам.доллар дутав гэдгийг шалгаж, ярих ёстой” гэсэн бол МАН-ын бүлгийн дарга С.Бямбацогт үүн дээр нэмж “хуулийн дагуу төсөвт тусгасан бүтээн байгуулалтын ажлыг хувийн компани өөрийнхөө зардлаар хийж гүйцэтгээд эргээд улсаас мөнгөө авдаг. Хэн ч хийсэн ажлынхаа хөлсийг авах эрхтэй. Гэтэл үүнийг хөгжлийн банкнаас мөнгө зээлсэн мэтээр тайлбарлаж байгааг ойлгохгүй байна. Хөгжлийн банкнаас санхүүжилт авсан мянгаад аж ахуй нэгж бий. Хэнд ч хуулийн дагуу хөрөнгөө барьцаалаад зээл авах эрхтэй. Үүнийг хууль бус үйлдэлтэй хольж хутгах хэрэггүй. Гэхдээ миний хувь эзэмшдэг компаниудын хувьд хөгжлийн банкнаас ямар ч зээл аваагүй. Үүнийгээ АТГ-т хандан шалгуулсан. Удахгүй дэлгэрэнгүй мэдээлэл өгөх болно гэв.
Мөн УИХ-ын гишүүн Н.Номтойбаяр “Мак компани нь 600 орчим тэрбум төгрөгийг өөрсдөөс хөрөнгө оруулалт хийж, үлдсэн 20 орчим тэрбум төгрөгийг хөгжлийн банкнаас зээлж цементийн үйлдвэр байгуулсан. Гэтэл хөгжлийн банкнаас 600 тэрбум төгрөгийг авсан мэтээр буруу ойлгуулж байна. Энэ бол ТЭЗҮ нэртэй цаасан дээр бичсэн, төмөр зам гэж овоолсон шороотой адил зүйл биш. Ажлын гүйцэтгэл 90 орчим хувьтай явж байгаа. Хуулийн дагуу хийгдсэн ажил. Гэтэл зарим хүмүүс өөрдсийнхөө хулгайн хэрэгтэй хутган тайлбарлаж байна. Хэн нь хуулийн дагуу, хэн нь хулгай хийж мөнгө завшсаныг тогтоолгоно" гэв.
Т.Энхэлээ
Сэтгэгдэл (5)