Бие даагч гишүүдийн зөвлөл өнөөдөр хуралдаж энэ долоо хоногт байнгын хороо, чуулганы нэгдсэн хуралдаанаар хэлэлцэх асуудлуудын талаар хэлэлцэж байр, сууриа нэгтгэсэн байна. Тус зөвлөлөөс Хүн амын орлогын албан татварын тухай хуулийг дэмжиж буйгаа илэрхийлэв. Учир нь татвараар нийслэл хотын хүн амын төвлөрлийг сааруулж болно гэж үзэж байгаа аж.

Харин шинээр батлагдсан Эрүүгийн тухай болон Зөрчлийн тухай хуулийг эсэргүүцэж байгаа гэдгээ Ц.Даваасүрэн гишүүн хэллээ. Учир нь энэ хуульд иргэдийн эрхийг ноцтойгоор зөрчих хэд, хэдэн заалт орсон гэлээ. Тухайлбал, хүний нэр хүндийг онц ноцтойгоор гүтгэсэн бол гэмт хэрэг биш зөрчил хэмээн үзэж 2.5 сая төгрөгийн торгууль оногдуулна гэж заасан нь маш ноцтой алдаа гэж үзэж байгаа аж. Энэ талаар бие даагч гишүүд хууль санаачлагч гишүүдээс асуухад УИХ-ын гишүүд өөрсдөө хүний нэр төр гүтгэхийг зөрчил гэж үзэхээр өөрчилсөн гэсэн тайлбарыг өгсөн байна. Түүнчлэн бие даагч гишүүд Эрүүгийн болон Зөрчлийн шинэ хууль бол хөрөнгөтэй хүмүүст боломж олгосон, нэг ёсондоо халамжийн хууль болж байна гэсэн юм.

Үүнээс гадна буу, сумны наймааг ч гэмт хэрэг биш зөрчилд хамруулсан байгааг дэмжихгүй гэлээ.

Засгийн газраас “Гацууртын ордын төрийн эзэмшлийн хувь тогтоох тухай” УИХ-ын тогтоолын төслийг УИХ-аар хэлэлцүүлэхээр гурав дахь удаагаа оруулж ирээд байна. Үүнд бие даагч гишүүд эсрэг байр сууриа хэвээр хадгална гэв. Ц.Даваасүрэн гишүүн “Орхон голын саваар амьдарч байгаа иргэд, гол усны ундаргыг бодсон ч үүнийг дэмжих ёсгүй. Уулын оройг нь л тусгай хамгаалалтад авсан нэрээр бэлд нь байгаа олдворуудаа устгаж, алтыг нь ухах гэж байна. Хоёр тэрбум ам.доллараар хэмжигдэх алтнаас зөвхөн 200 сая ам.доллар буюу аравхан хувийг Монгол Улс авч үлдэхийн төлөө байгалиа сүйрүүлэх гэж байгаа учир үүнийг эсэргүүцэж байна” аж. 

Бие даагч гишүүд иргэдийн газрыг үл маргах журмаар хураан авч, худалдах заалттай Үл хөдлөх эд хөрөнгийн барьцааны тухай хуулийн заалтыг хүчингүй болгох нь зөв гэж үзэж байгаа. Уг хуулийн заалтаар банк болон мөнгө хүүлэгчдийг өөгшүүлсэн, газрыг хэн дуртай нь хураан авч, худалдан борлуулахыг дэмжинэ гэж үзэж байгаа юм. Харин Үндсэн хуулийн цэц энэ заалт нь Үндсэн хууль зөрчсөн байна гэдгийг олж тогтоогоод түдгэлзүүлснийг УИХ дэмжиж хүлээж авах ёстой гэж С.Ганбаатар гишүүн тайлбарлав. Мөн Хөдөлмөрийн тухай хуульд ажилтан, албан хаагчдад хэд хэдэн халгаатай заалт орж ирж байгааг шүүмжилж, энэ хуулийн алдаатай заалтуудыг залруулахын төлөө ажиллана гэдгээ илэрхийлсэн юм. 

Т.Энхэлээ