Ардчилсан намын гүйцэтгэх зөвлөл хуралдаж ИЗНН, МҮАН-тай нэгдэх асуудлыг хэлэлцсэн. Тус намын Ерөнхий нарийн бичгийн даргын үүрэг гүйцэтгэгч Л.Эрхэмбаяр энэ талаар “ИЗНН-тэй нэгдэхэд буруудахгүй, нэгдэхгүй байлаа гээд алдах юмгүй” хэмээн ярьсан билээ.

Тэгвэл ИЗНН-ынхан АН-тай нэгдэхгүй гэлээ. Тус намынхан хэлэхдээ “Иргэний зориг ногоон намыг Ардчилсан намтай нэгдэх гэж байгаа мэтээр АН-ын удирдлагууд хэвлэл мэдээллийн хэрэгслээр мэдээлэл тараасан нь үндэслэлгүй зүйл. ИЗНН-ын хувьд АН-тай нэгдэх талаар албан ёсны ямар нэгэн яриа хэлцэл хийгээгүй болно. Тэгээд ч ИЗНН Ардчилсан намтай нэгдэхгүй” гэв.

Мөн энэ асуудлаар тус намынхан Ардчилсан намд шаардлага хүргүүлэхээр болсон байна.

Уг шаардлагад “Засгийн эрхийг барьж байгаа АН улс төрийн бусад намуудын дотоод хэрэгт хууль бусаар оролцох биш 2012 оны сонгуульд амалсан амлалтаа биелүүлэхийн төлөө ажиллах хэрэгтэй. Мөн бусад намын бие даасан үйлдэлд эрээ цээргүй халдах бүдүүлэг байдлаа зогсоохыг шаардсан байна. Уг шаардлагыг хүлээж авахгүй бол хуулийн дагуу холбогдох байгууллагад хандана" гэжээ.

Т.Энхэлээ