ИЗНН-ыг АН-тай нэгдэнэ гэх мэдээлэл гарч буй. АН-ын Гүйцэтгэх зөвлөл хуралдаж ИЗНН, МҮАН-тай нэгдэх асуудлаар ярилцсан гэдгийг албаныхан баталсан. Мөн АН-ын Ерөнхий нарийн бичгийн даргын үүрэг гүйцэтгэж Л.Эрхэмбаяр энэ талаар “ИЗНН-тэй нэгдэхэд буруудахгүй, нэгдэхгүй байлаа гээд алдах юмгүй” хэмээн ярьсан билээ.

Харин ИЗНН-ын хэсэг бүлэг гишүүд өчигдөр хэвлэлийн бага хурал хийж “Иргэний зориг ногоон намыг Ардчилсан намтай нэгдэх гэж байгаа мэтээр АН-ын удирдлагууд хэвлэл мэдээллийн хэрэгслээр мэдээлэл тараасан нь үндэслэлгүй зүйл. ИЗНН-ын хувьд АН-тай нэгдэх талаар албан ёсны ямар нэгэн яриа хэлцэл хийгээгүй болно. Тэгээд ч ИЗНН Ардчилсан намтай нэгдэхгүй. Уг асуудлаар АН-д шаардлага хүргүүлнэ. Энэ мэтээр улс төрийн соёлгүй байвал хуулийн байгууллагад хандана” гэж мэдэгдсэн.

Тэгвэл ИЗНН-ын гишүүн УИХ-ын гишүүн С.Дэмбэрэл намынхаа дээрх нөхдөөс тэс өөр зүйлийг ярьжээ.

Тэрбээр “Өнгөрсөн бямба гаригт хэсэг хүн цуглаж, энэ асуудлыг албан бусаар яриад санал хуваагдсан юм билээ. Тэгээд нэг хэсэг нь өөрсдийнхөө дураар хэвлэлийн хурал хийсэн юм шиг байна. Улс төрийн зөвлөл албан ёсоор хуралдаж, ямар нэг шийдвэр гаргаагүй. Ирэх долоо хоногийн даваа гарагт хуралдаж албан ёсоор энэ асуудлыг ярилцана.Ардчилсан намаас албан ёсоор санал ирүүлээгүй. Би АН-тай нэгдэхийг буруу гэж үзэхгүй байгаа. Ардчилсан чиг баримжаатай намууд нэгдэж хүчээ зузаатгах шаардлагатай гэж үздэг. АН-тай нэгдвэл хөл нь бат бэх, хүчирхэг болно. Энэ хөл дээр суурилсан улс төр, эдийн засаг, нийгмийн бодлого олон түмэнд хүрэх нь илүү гэж би харж байна. Би саналаа хэлсэн” гэлээ.

Т.Энхэлээ