Өнгөрсөн лхагва гарагт  Эдийн засгийн байнгын хороо болон Төсвийн байнгын хорооны хамтарсан хуралдаанаар Хөгжлийн банкинд хийсэн шалгалтын дүнг хэлэлцэх байсан. Гэвч шалгалтыг явуулсан ажлын хэсгийн ахлагч, УИХ-ын гишүүн Л.Энх-Амгалан хөдөө томилолттой явж байгаа гэх шалтгаанаар уг хуралдаан хойшилсон юм. Ажлын хэсгийн ахлагч өөрийн биеэр хуралдаанд сууж гишүүдэд үнэн зөв мэдээллийг өгөх ёстой. Гэтэл гишүүдийн асуултад хариулах ёстой гол хүн нь хөдөө явж байгаа учир уг асуудлыг хэлэлцэхийг хойшлуулсан нь зөв гэсэн саналыг тус хуралдаанд суусан гишүүдийн олонх нь дэмжсэн юм

Тэгвэл өнөөдөр тус ажлын хэсгийнхэн хуралдах байсан ч ажлын хэсгийн ахлагч эзгүй гэдэг шалтгаанаар дахин хойшиллоо.

Хөгжлийн банкнаас зөрчил илэрсэн тухай мэдээллийг МАН-ынхан тэр дундаа Л.Энх-Амгалан гишүүн анх олон нийтэд түгээсэн. Түүнийг мэдээлэл хийсний дараагаар уг асуудал нийгэмд дуулиан тарьж, АН, МАН-ынхан хоорондоо зөрчилдөж, бие бие рүү гээ дайралт хийж эхэлсэн. Гэтэл яг үнэн, зөвийг тунгаан хэлэлцэх чухал цаг үед ажлын хэсгийн ахлагч өөрөө хөдөө яваад өгсөн нь хүмүүсийн гайхлыг төрүүлэв. Уг асуудлаар нийгэмд дуулиан тарьж орхичихоод зөв, бурууг ярилцах үеэр алга болсон нь Хөгжлийн банк болон АН-ын нэр хүндийг унагах гэсэн тактик юм биш биз гэж хардах нэгэн ч байгаа юм.

Нөгөөтэйгүүр Л.Энх-Амгалан гишүүнийг хөдөө явж байх хойгуур төрийн ажил олон хоногоор гацаж, хойшиллоо. УИХ-ын гишүүд УИХ-ын чуулган завсарлангуут тойрогтоо ажиллах ёстой. Гэтэл сонгууль дөхөөд гишүүд сонгогчиддоо хайр зарлан ойр, ойрхон тойрог руугаа гүйдэлтэй болсны жишээг Л.Энх-Амгалан гишүүн харуулж байна.

Хамгийн гол нь ажлаа зохицуулахгүй бол иргэдэд хайр зарлаад явж байх хооронд төрийн ажил олон хоног гацсаар байна шүү эрхэм гишүүнээ.

Т.Энхэлээ