УИХ дахь МАН-ын бүлэг Сонгуулийн тухай хуулиар АН-ын бүлэгт шаадлага тавьсан байгаа. Тэд сонгуулийн саналын хуудсыг хар машинаар бус гар аргаар тоолох ёстой гэж үзэж байгаа юм. Харин үүнийг АН-ын бүлэг эсэргүүцэж хүлээж авахгүй байгаа учир өнөөдрөөс эхлэн байнгын хорооны хуралд суухгүй байхаар шийджээ.

Тус бүлгийн гишүүн Д.Оюунхорол энэ талаар ярихдаа "Байнгын хороод хуралдахгүй, УИХ-ын үйл ажиллагаа хэвийн биш болоод байна. Байнгын хороод ирц хүрэхгүй, гишүүд ирэхгүй байгаа учраас хойшиллоо. Энийг юу гэж харж байна гэвэл АН-ынхан ярьсан, хэлэлцсэн зүйлээсээ байнга ухарч байна. УИХ-аар 2016 оны төсөв хэлэлцэх үед сонгуулийн хуулиа хамгийн зөв байдлаар шийдье гэсэн. Монголын ард түмний өгсөн санал тоологддог, сонгууль шударга ил тод, саналаа өгсөн иргэд “Миний санал тоологдсон нь баталгаатай, би өөрийнхөө өгсөн саналыг хянаж үзье” гэж яриад байна. Сонгуулийн хуульд оруулах гол өөрчлөлтийн нэгийг саналын хуудсыг автомат машинаар тоолъё, дээр нь гар хяналтын тоолого явуулъя. Сонгууль маргаангүй, будилаангүй болсон гэдгийг баталгаажуулах гол үндэс энэ. Хоёр хэлбэрээр тоолсон байхад улстөрийн намууд ямар ч маргаан үүсгэхгүйгээр хүлээн зөвшөөрнө гэж үзсэн. Харамсалтай нь, энэ асуудлыг ярилцахгүй гэж АН-ын  бүлэг шийдвэрлэсэн учраас УИХ дахь МАН-ын бүлгийн хувьд өнөөдрөөс эхлэн байнгын хорооны хуралдаанд оролцохгүй, бусад улс төрийн намуудтай хамтран сонгуулийг маргаангүй, шударга явуулах боломжийг хуулиар бүрдүүлж өг гэдэг шаардлага тавиад байна. Хэрвээ УИХ 2015 оны 12 дугаар сарын 31-н гэхэд Сонгуулийн хуульд өөрчлөлт оруулж баталж чадахгүй бол ирэх оны сонгууль хуучин буюу одоо мөрдөж буй хуулиар л явна" гэв.

Т.Энхэлээ