Чуулганы нэгдсэн хуралдааны эхэнд Гацууртын ордын асуудлыг хэлэлцэх байсан ч "Шударга ёс" эвслийн бүлэг завсарлага авсан.

Өнөөдөр хэлэлцэх байсан Гаалийн тариф, гаалийн татварын тухай хуульд нэмэлт оруулах тухай, Ард нийтийн санал асуулгын тухай хуульд өөрчлөлт оруулах тухай хуулийн төсөл, Нийгмийн даатгалын сангаас олгох тэтгэвэр, тэтгэмжийн тухай хуульд нэмэлт өөрчлөлт оруулах тухай хуулийн төслүүдээр тус бүр тав хоногийн завсарлага аваад байна. УИХ дахь МАН-ын бүлгийн дэд дарга Н.Номтойбаяр завсарлага авах болсон үндэслэлээ  "УИХ ирцээ бүрдүүлэх ёстой. Мөн Ардчилсан намын бүлгийн нэр бүхий гишүүн МАН-ын гишүүдийн санаачилсан хуулийн төслийг хулгайлж, өргөн барьсан” гэж тайлбарлав.

Харин УИХ-ын гишүүн О.Баасанхүү "Хуулиа хэлэлцүүлж батлах нь чухал юм уу эсвэл "бид санаачилсан" хэмээн өмчлөх нь чухал юм уу. Ард түмэнд хэрэгтэй хууль юм бол хэн санаачилсан нь хамаагүй батлуулах ёстой биз дээ" гэв. 

Үүний дараа чуулганы нэгдсэн хуралдаанаар Хөдөлмөрийн тухай хуулийн төслийн шинэчилсэн найруулгын төслийг хэлэлцэх байсан ч УИХ-ын дарга З.Энхболд “Бид Н.Чинзоригийн боловсруулсан хуулийн төслийн бөөсийг түүх гэж суугаагүй. Маш их өөрчлөлт оруулах шаардлагатай хууль. Ерөнхий сайдтай би энэ талаар ярина, Засгийн газарт нь буцаана. Б.Гарамгайбаатар дарга завсарлагаа ав. Төслийг буцаана” гэв.

УИХ дахь Ардчилсан намын бүлгийн дарга Б.Гарамгайбаатар хэлсэн ёсоор нь мөн завсарлага авах хүсэлт гаргаж ёсоор нь болгов.

Ийнхүү чуулганы хуралдаанаар хэлэлцэх хэд, хэдэн чухал асуудлаар УИХ дахь намын эвслийн бүлгүүд завсарлага авч ажлыг тав хоногоор гацаалаа.

Т.Энхэлээ