МАХН-ын Ерөнхий нарийн бичгийн даргын үүргийг түр орлон гүйцэтгэгч Ц.Шаравдорж, нарийн бичгийн дарга Э.Эрдэнэжамъяан нар дөнгөж сая Төрийн ордонд мэдээлэл хийлээ. Тэд энэ үеэр МАХН-ын дарга Н.Энхбаярыг Шадар сайдад, Шадар сайд Ц.Оюунбаатарыг Эрүүл мэндийн сайдад томилуулах хүсэлтийг Ерөнхий сайд Ч.Сайханбилэгт өргөн барьсан гэдгээ албан ёсоор мэдэгдлээ. 

Үүний дараа МАХН-ын Ерөнхий нарийн бичгийн даргын үүргийг түр орлон гүйцэтгэгч Ц.Шаравдоржоос цөөн асуултад хариулт авлаа. 

- Н.Энхбаярын ялтайд тооцох хугацаа дууссан уу. Ялтайд тооцсон үед Н.Энхбаяр улс төрийн албан тушаал хаших боломжтой юу?

- Өршөөл үзүүлэх тухай хуулиар нэмэгдэл ял буюу ялтайд тооцох хугацаа өршөөгдсөн. Тийм учраас ямар ч саад байхгүй.

- Танай намаас даргынаа дэвшүүлж байгаа юм уу АН-аас санал тавьсан юм уу?

 Манайх ямар нэгэн саналыг эхэлж тавиагүй. Энэ санаачлагыг Монгол Улсын Ерөнхий сайдын зүгээс гаргасан. Нэлээн хэд хоногийн өмнө. Энэ асуудлыг бид нам дээрээ нэлээн ярилцаж шийдвэр гаргасан.

 -Яагаад Засгийн газрын бүтцэд өөрчлөлт оруулахаар шийдсэн юм бэ. Шалтгаанаа тайлбарлахгүй юу?

-Ямар ч албан тушаал дээр манай намын дарга ажиллах бүрэн боломжтой хүн. Өмнө нь ямар албан тушаал эрхэлж байсныг та бүхэн мэдэж байгаа.

-Ц.Оюунбаатар Шадар сайдын ажлын сайн хийж чадахгүй байсан юм уу?

-Ц.Оюунбатаар сайд маань өөрөө ажлаасаа чөлөөлөгдөх хүсэлтээ Ерөнхий сайдад тавьсан.

 -МҮАН-тай эсвэл болж УИХ-д сууж байгаа. Энэ асуудалд МҮАН-тай зөвшилцсөн үү?

-МАХН-МҮАН-ын УИХ дахь бүлгийн хүсэлт Ерөнхий сайдад очсон байгаа. Тийм учраас МҮАН-тай санал нэгтэйгээр асуудал тавьсан.

-Э.Энхбаяр анх Солонгосоос ирэхдээ Шадар сайд хийхгүй гэж мэдэгдэж байсан. Гэтэл яагаад санаагаа өөрчилсөн юм бол?

-Манай нарийн бичгийн дарга нарын хурлаар энэ асуудлыг хэлэлцсэн. Тухайн намын хамгийн сайн хүн сонгууль удирдаж ордог. Тиймээс Н.Энхбаяр дарга өөрөө хүсч байгаа эсэх нь чухал биш. Энэ бол намын гишүүдийн байр суурь. Анх 2012 онд яригдаж байсан. Тиймээс гайхаад байх асуудал биш. Засагт хамтарч байгаа л юм чинь намын дарга нар өөрсдөө Засагт орж ажиллах ёстой гэдэг байр суурьтай байна. Н.Энхбаяр дарга 2012 онд Ерөнхийлөгчийн зарлигаар өршөөгдсөн. Одоо ялгүй байгаа.

 
Т.Хулан