МАХН-ын дарга Н.Энхбаярыг Шадар сайд болно гэх мэдээлэл сүүлийн үед хүчтэй тарсан. Хэвлэл мэдээллийн хэрэгслүүдэд гарснаар бол уг саналыг гаргаж МАХН-аас Ерөнхий сайдад өргөн барина гэж байв. Өөрөөр хэлбэл Ерөнхий сайдыг уг асуудлаар шахна гэж байсан юм. Харин Ерөнхий сайд Ч.Сайханбилэг Шадар сайдад Н.Энхбаярыг дэмжихгүй байх гэсэн таамаг иргэдийн дунд байлаа. Учир нь Н.Энхбаярыг дэмжих нь Ерөнхий сайдад өөрт нь ашиггүй. Мөн Н.Энхбаярын улс төрийн албан тушаал хаших эрх нь нээгдээгүй учраас сайд болох боломжгүй гэх яриа ч яригдаж байлаа.

Тэгвэл Н.Энхбаяр саад төвөггүй, улаан гэрлээр Шадар сайд болох нь тодорхой байна. Учир нь түүнд Шадар сайд болох саналыг Ерөнхий сайд Ч.Сайханбилэг түрүүлж тавьсан байна. Хүсэлтийнх нь дагуу МАХН-ын Гүйцэтгэх товчоо хуралдаж, Шадар сайдад намынхаа даргыг нэр дэвшүүлэх нь зүйтэй гэдэг саналд нэгджээ. Энэ дагуу одоогийн Шадар сайдыг Эрүүл, мэндийн яам руу жийж, оронд нь Н.Энхбаярыг ажиллуулах хүсэлтийг өчигдөр албан ёсоор Ерөнхий сайдад өргөн барьжээ.

Ерөнхий сайд  өөрөө эхэлж санал тавьсан учраас Н.Энхбаярыг дэмжих нь тодорхой. Тэгэхээр Н.Энхбаяр ямар ч зовлонгүй Шадар сайд болох нь. Ерөнхийлөгчтэй зөвшилцөх асуудалд бага зэргийн бэрхшээл тулгарч болох ч төрийн тэргүүн зөвшөөрсөн эсэх нь шийдвэр гаргахад нөлөөлж чадахгүй юм.

Харин Н.Энхбаярын улс төрийн албан тушаал хаших эрх нээгдсэн, нээгдээгүй гэх ярианы хувьд МАХН-ын нарийн бичгийн дарга Э.Эрдэнэжамъяан доорх хариултыг өгсөн юм. Тэрбээр “Н.Энхбаяр даргын улс төрийн албан тушаал хаших эрх нь нээлттэй. Тухайн намын хамгийн сайн хүн сонгууль удирдаж ордог. Тиймээс Н.Энхбаяр дарга өөрөө хүсч байгаа эсэх нь чухал биш. Энэ бол намын гишүүдийн байр суурь. Анх 2012 онд яригдаж байсан. Тиймээс гайхаад байх асуудал биш. Засагт хамтарч байгаа л юм чинь намын дарга нар өөрсдөө Засагт орж ажиллах ёстой гэдэг байр суурьтай байна. Хамгийн том албан тушаал нь Шадар сайд. Тэгэхээр энэ албан тушаалыг намын дарга нь хаших ёстой. Н.Энхбаяр дарга 2012 онд Ерөнхийлөгчийн зарлигаар уучлагдсан. Одоо ялгүй байгаа. Түүнд Шадар сайдын ажлыг хийх хангалттай чадвар, туршлага бий” гэсэн юм.

Тэр бүү хэл УИХ-д нэр дэвших эрх нь ч нээлттэй гэж тэрбээр хэлэв. Тэгэхээр МАХН-ын дарга Н.Энхбаяр 2016 оны сонгуульд нэр дэвших юм байна.

Ямартай ч монголчууд удахгүй Н.Энхбаяр гэдэг Шадар сайдтай болох нь.

УИХ-ын гишүүн М.Зоригт: Н.Энхбаярыг Монголын төрд ойртуулж болохгүй

- МАХН-ын авлига, хээл хахууль, болохгүй бүх тогтолцооны бэлгэ тэмдэг болсон энэ нөхрийг дэвшүүлж байгаа нь өөрөө улс төрийн том алдаа гаргалаа гэж үзэж байна. Бидний хэдэн монголчууд өөр зүгт өөрөөр хөгжихийн төлөө ажиллаж байна шүү дээ. УИХ-ын гишүүний хувьд энэ асуудлыг дэмжихгүй гэдэг байр сууриа илэрхийлсэн. Монголчууд авлигыг “NO” гээд хэлчихсэн. Хээл хахуулийг үгүй гээд хэлчихсэн. Төрийн өндөр албан тушаалтнууд улсын мөнгө шамшигдуулдаг үйлддийн эсрэг үргэлж байсан. Байсаар ч байх болно. Үгүй би Н.Энхбаярыг сайд болгохгүйн төлөө улстөрчийн хувьд, иргэн хүний хувьд ажиллах болно. Өнөөдөр сайд өгнө авна гэдэг бол тийм амар шийдвэр биш. Мөн шударга ёсны төлөөх байр сууринаас хэзээ ч ухарч болохгуй. Өөрийнхөө байр сууриар бусад гишүүдэд, Ерөнхий сайдад, ер нь шударга ёсны төлөө зогсч байгаа ард иргэдэд хандаж уриалж байна. Ийм хүмүүсийг, Н.Энхбаяр тэргүүтнийг Монголын төрд ойртуулж болохгүй л гэжхэлмээр байна. МАХН- ынхан Н.Энхбаярыг Шадар сайд болгохоор зүтгүүлж магадгүй. Яагаад гэвэл тэр чинь хувь хүн Н.Энхбаярын өөрийнх нь хувийн нам шүү дээ.

Н.Эрдэнэжамъян: Ерөнхий сайд Н.Энхбаяр даргыг Шадар сайд болооч гэсэн

- Манай намын зүгээс ямар нэгэн саналыг тавиагүй. Анх нэлээд хэд, хоногийн өмнө Ерөнхий сайд Ч.Сайханбилэг санаачилгыг гаргасан. Бид нам дээрээ энэ асууддыг бодож байгаад эцсийн шийдвэрийг албан ёсны байгууллагуудаар дамжуулан гаргаж байгаа юм. Н.Энхбаяр сайд болж яагаад болдоггүй юм. Ямар ч албан тушаал дээр МАХН-ын дарга Н.Энхбаяр ажиллах бүрэн боломжтой хүн. Урьд нь ямар албан тушаал эрхэлж байсныг бүгд мэднэ. Тиймээс харшлах зүйлгүй болов уу гэж бодож байна. Түүний албан тушаал хаших эрх нь нээлттэй.

Ц.Шаравдорж: -Ямар ч албан тушаал дээр манай намын дарга ажиллах бүрэн боломжтой хүн. Өмнө нь ямар албан тушаал эрхэлж байсныг та бүхэн мэдэж байгаа.

Т.ХУЛАН