АН-ын бүлэг өчигдөр хаалттай хуралдаж, төгсгөлд нь сэтгүүлчдийг байлцуулан сонгуулийн санал тооллогын машин хэрхэн ажиллаж буйтай танилцуулав. Сонгуулийн ерөнхий хорооноос уг машины ажиллах горимыг танилцуулсны дараа, саналыг үнэн, зөв тоолдог, эсэхийг магадлахын тулд бяцхан санал хураалт явуулж, дүнг нь сэтгүүлчдийн хамт хар машинаар тоолж, түүнийгээ гараар давхар тоолж шалгахад ямар нэгэн “но” илэрсэнгүй. Энэ үеэр АН-ын дарга З.Энхболд "Уг машинд эргэлзээд буй хүмүүст би ганцхан зүйл хэлж байгаа. 2012 оны УИХ болон нийслэл, орон нутгийн, 2013 оны Ерөнхийлөгчийн сонгууль зэргээр бид энэ машиныг гурван удаа шалгасан. Ийм байхад итгэхгүй байгаа нь цэвэр улс төрийн шалтгаантай. Эдгээр сонгуульд саналын ямар ч зөрүү гараагүй. Зөрүү гарах үндэслэл байхгүй. Нэг сонгуульд дунджаар 1.2- 1.3 сая орчим хүн санал өгч байгаа. Нийт саналын хуудасны зургийг бүх нам, нэр дэвшигч, ажиглагчид тараасан. Өөрөөр хэлбэл, тэдэнд 3.6-3.8 сая орчим зураг бий гэсэн үг. Нөгөө талаас санал тоолсон 2500 орчим машины дүнг хэвлэсэн цаас нь бий. Энэхүү тараасан файл болон тооллогын дүн хоёрын дундаас зөрүү гарах юм бол Сонгуулийн ерөнхий хороо авч үзнэ. Энэ нь санал тоолох машинаар луйвар хийж болохгүйн хамгийн том баталгаа. Монголчууд их хардамтгай учраас бүх зуйлийг ил болгосон. Ирэх оны сонгуулийг энэ машинаар явуулна. Гараар тоолох нь ч нээлттэй. Сонгуулийн ерөнхий хороо энэ машиндаа итгэлтэй байгаа нь зөв. Үүнээс сайн аргыг дэлхийн улс орнууд одоогоор бодож олоогүй байна. Цаас үлддэггүй байсан бол би ч бас эргэлзэх байлаа. Тэгтэл энэ машинаас цаас, зураг үлддэг” гэсэн юм.

Мөн тус бүлгийн дэд дарга Ш.Түвдэндорж “МАН-ынхан автомат машины дүнг дахин гараар тоолж, сонгуулийн хэсгийн хороонд нам, эвслийн төлөөллийг оруулах саналтай байгаа нь өмнөх сонгуулийн будлиантуулдаг аргыг эргэн сэргээх гэсэн санаархал. 2008 оны долдугаар сарын 1-нд юу болсныг ард түмэн мартаагүй. Тийм учраас Сонгуулийн хуулийг хэлэлцэх боломжгүй. Харин Улс төрийн намуудын тухай хууль маш чухал” гэж байлаа. Түүнчлэн Ц.Оюунгэрэл гишүүн 2008 оны сонгуульд түүнийг нэр дэвшин өрсөлдөж байхад 2000 сонгогчийн саналыг 20 сая төгрөгөөр худалдах гэсэн этгээд түүн рүү утсаар ярьж байсныг дурдаад, санал тоолох автомат төхөөрөмж нэвтрүүлэхээс өмнө сонгуулийн булхай, луйвар газар авч байсныг тэмдэглэсэн юм.

УИХ-ын даргын ахлах зөвлөх С.Ламбаа өөрийн цахим хуудаснаа "МАН гар аргаар тоолж 72 суудал авч байлаа. Хэрэв хар машин булхайлдаг байсан бол АН юу гэж 35 суудал авч зовж байхав дээ" хэмээн бичжээ.