Ирэх 2016 оны нэгдүгээр сараас хэрэгжиж эхлэх Хүүхэд харах үйлчилгээний тухай хуулийн бэлтгэл ажил хэр явагдаж байгаа талаар УИХ-ын гишүүн Л.Эрдэнэчимэгээс тодрууллаа.

-Хүүхэд харах үйлчилгээний тухай хууль ирэх сараас хэрэгжиж эхлэх гэж байна. Хуулийн хэрэгжилтэд нийт хичнээн төгрөг төсөвлөсөн бэ?

-Бид нар төсөв дээрээ нилээн сайн ажиллаж байж 10 тэрбум төгрөг батлуулсан. Хэдийгээр хангалттай мөнгө биш ч гэсэн 2016 ондоо 10 мянган хүүхдийн асуудлыг шийдвэрлах боломжтой болж байгаа учраас боломжийн гэж харж байна.

-Сургагч багш нарын сургалт эхэлж байгаа гэсэн?

-Өнөөдөр өглөө 09:00 цагаас эхлэн Хүн амын хөгжил, нийгмийн хамгааллын яаман дээр сургагч багш нарын сургалтын үйл ажиллагаа эхэлж байгаа. Хөдөө орон нутаг бүх аймгуудаас сургагч багш нар ирчихсэн 300 гаруй хүнтэй сургалт эхэлж байна. Энэ багш нарт гурав хоногийн турш сургалт явуулж бүрэн мэдээллийг нь өгнө. Багш нар маань орон нутагтаа очингуутаа хүүхэд харах үйлчилгээ эрхлэх хүсэлтэй байгаа хүмүүсээ бүртгээд сургах юм. Тэр сургалт нь долоо хоногт орчим байна. Журам, стандарт, сургалтын хөтөлбөр батлагдчихсан. Эхний хүүхэд харах үйлчилгээ хоёрдугаар сарын дундуур гэхэд эхлээд явчих байх гэж бодож байна.

-Хүүхэд харах үйлчилгээнд нэг хүүхдэд хэдэн төгрөг төсөвлөсөн бэ?

-Улсын төсвөөс баталсан мөнгөөр бол нэг хүүхдэд сард 116 мянган төгрөг олгохоор журам батлагдсан. Тэгэхээр таван хүүхэд харж байгаа нэг иргэн бол улсаас 560 мянгөн төгрөг авна, дээрээс нь эцэг эхчүүдээс авах төлбөрийг журамласан байгаа. Тодруулбал, улсаас авч байгаа мөнгөний 60 хувиас хэтрүүлэхгүйгээр төлбөр авна гэж заасан. Өөрөөр хэлбэл эцэг эхчүүд дунджаар 60 мянга орчим төгрөг нэмж төлж болно.

-10 мянган хүүхдээ яаж сонгож хүүхэд харах үйлчилгээнд хамруулах вэ?

-Цэцэрлэгт хамрагдаж чадахгүй байгаа 60 мянга орчим хүүхдээс 10 мянгыг нь хамруулна гэхээр квот тогтоох шаардлагатай болж байгаа. Жишээлбэл, нийслэлийн Сонгинохайрхан дүүрэгт гэхэд 9мянган хүүхэд цэцэрлэггүй байна. Тэгэхээр тухайн аймаг, дүүргийн цэцэрлэгт хамрагдаж чадахгүй байгаа хүүхдийн тоонд нь тэгш хуваагаад тодорхой квотуудыг олгоно.

-Хууль хэрэгжиж эхэлснээр нийтдээ хичнээн ажлын байр бий болох вэ?

-Улсаас төсөвлөсөн 10 тэрбум төгрөгөнд бол хоёр мянган шинэ ажлын байр бий болно. Энэ үйлчилгээ эрхэлж байгаа шинэ ажлын байр бүрт 400-450 мянган төгрөгийн цалин олгох боломжтой. -Хуулийн дагуу хүүхэд харах багшийн насыг хэд байхаар тогтсон бэ? -18-65 хүртэлх насны гэмт хэрэгт холбогдож байгаагүй, бүрэн дунд боловсролтой, эрүүл иргэн багшилна гэж заасан байгаа.

-Нэг иргэн дээд тал нь хэдэн хүүхэд харж болох вэ?

-Хуулийн дагуу нэг иргэн таван хүүхэд авч болно. Харин хоёр хүн нийлж ажиллах юм бол 10 хүүхэд авна. Гэхдээ 10-аас илүү хүүхэд авч болохгүй гэж заасан байгаа. Тэгэхээр хоёр багштай, 10 хүүхэдтэй нэг хүүхэд харах төв байж болно гэсэн үг.

-Хүүхэд харах үйлчилгээ эрхлэх обьектод ямар шаардлага тавих вэ. Жишээ нь хүүхдийн аюулгүй байдлыг бодоод заавал камержуулсан байх ёстой гэсэн шаардлага байгаа юу?

-Обьектод тодорхой хэмжээний шаардлагууд бол тавигдана. Гэхдээ хэтэрхий чанга шаардлага тавьж чадахгүй. Жишээ нь ямар ч дэд бүтэцгүй газар боловсон ариун цэврийн өрөөтэй бай гэж хэлж чадахгүй шүү дээ. Тийм газар камержуулах асуудал бол бас л хүнд. Тэгэхээр эцэг эхчүүд хяналтын үүргээ хариуцах ёстой. Эцэг эхчүүд өөрсдөө л хамгийн дотно хүндээ л хүүхдээ өгч харуулна гэсэн үг. Би эцэг эхчүүдийг огт танихгүй хүнд хүүхдээ шууд аваачаад өгчихгүй байх гэж бодож байна. Ядаж л хажуу хашааны таньдаг хүн, эсвэл орцны чинь эмээ хүүхэд харах үйлчилгээ эрхэлж байвал тэнд өгч болно шүү дээ. Тэнд л хяналтаа тавина гэсэн үг.

Т.Энхэлээ