Байгаль орчин, хүнс, хөдөө аж ахуйн байнгын хорооны хуралдаан өнөөдөр хоёр асуудал хэлэлцэхээр төлөвлөсөн байна.

Тогтоолын төслийг хэлэлцэхийг хойшлуулав

Байнгын хорооны хуралдаанаар эхлээд “Органик бүтээгдэхүүн үйлдвэрлэлийн “Халх гол” хөдөө аж ахуйн бүс байгуулах тухай” тогтоолын төслийг хэлэлцэх, эсэх асуудлыг шийдэх байсан ч Хүнс, хөдөө аж, ахуйн сайд Р.Бурмаа тогтоолын төслийг өнөөдрийн хэлэлцэх асуудлын дарааллаас хасч, хойшлуулах горимын санал гаргасан юм.

Учир нь өнөөдөр органик хүнсийг баталгаажуулах хууль эрх зүйн орчин бүрдээгүй байна. Органик хүнсний тухай хуулийн төслийг 7 дугаар сард УИХ-д өргөн барьж улмаар чуулганаар хэлэлцүүлэхээр дэмжигдэн С.Оюун гишүүнээр ахлуулсан ажлын хэсэг ажиллаж байгаа. Иймд энэ хуулийг хэлэлцэн баталтал “Органик бүтээгдэхүүн үйлдвэрлэлийн “Халх гол” хөдөө аж ахуйн бүс байгуулах тухай” УИХ-ын тогтоолын төслийг хойшлуулах саналыг гаргаж байгаа гэв. Ингэснээр уг асуудлыг хойшлуулах нь зүйтэй гэсэн горимын саналыг хуралдаанд оролцсон гишүүд 81.8 хувийн саналаар дэмжсэнээр уг асуудлыг түр хойшлуулахаар тогтлоо.

Л.Эрдэнэчимэгийг байнгын хорооны даргаар сонгохыг дэмжлээ

Мөн хуралдаанаар Байнгын хорооны даргыг сонгох тухай асуудлыг хэлэлцэн шийдвэрлэлээ. УИХ-ын гишүүн Б.Гарамгайбаатар Ардчилсан намаас Байгаль орчин, хүнс, хөдөө аж ахуйн байнгын хорооны даргад УИХ-ын гишүүн Л.Эрдэнэчимэгийг дэвшүүлсэн талаар танилцуулаа. Ингээд түүнийг тус байнгын хорооны гишүүдийн олонх нь дэмжлээ.

Т.Энхэлээ