Сонгуулийн хуулийн төслийн хэлэлцүүлгийг өчигдөр Төрийн байгуулалтын байнгын хороогоор хэлэлцээд өнөөдөр УИХ-ын чуулганаар хэлэлцэх гэтэл УИХ-ын гишүүн О.Баасанхүү “Миний боловсруулан өргөн барьсан хуулийн санал одоо хэлэлцэгдэх гэж буй асуудалд багтаагүй байна” хэмээгээд хуулийн төслөө тусад нь хэлэлцүүлэх санал гаргасан юм. Тиймээс уг асуудыг чуулганаар хэлэлцэхийг хойшлуулав. Одоо сонгуулийн хуулийг нэгтгэн боловсруулах ажлын хэсгийн хуралдаан болох гэж буй бөгөөд үүгээр МАХН-тай учраа ололцох юм. Учир нь тус хуулиар АН болон МАН-ынхан санал нэгдэж МАХН-МҮАН-ын “Шударга ёс” эвслийн бүлгийн боловсруулсан саналыг хасч хаясан байна. Өөрсдийнх нь саналыг хуулийн нэгтгэсэн төсөлд тусгаагүйгээс болж “Шударга ёс” өнөөдрийн чуулганы хуралдаанаар уг асуудлыг хойшлуулжээ.

АН, МАН ТАВАН ЗҮЙЛЭЭР НЭГДЭВ

 УИХ дахь нам, эвслийн бүлгүүдийн төлөөлөл оролцсон ажлын хэсэгт таван зүйлээр санал нэгджээ.

Тодруулбал,

1. 48:28 буюу одоогийн холимог тогтолцоог хэвээр хадгалахаар болсон байна.
2. Монгол улсын нутаг дэвсгэр нэг тойрог байсныг бүсчилсэн таван тойрог болгох.
3. Санал өгсөн сонгогчдын 28 хувийн босгогүй болгох.
4. УИХ, аймаг нийслэлийн ИТХ-ын сонгуулийг нэг өдөр зохион байгуулах.
5. Техникийн тооллогыг хэсгийн хороодын 50 хүртэл хувьд хийхээр болсон / Энэ талаар АН-ын бүлгийн дарга Б.Гарамгайбаатар “Хяналтын тооллого гэдэг нь гомдол гаргаснаар хийх тооллогыг хэлнэ. Техникийн санал нь тухайн автомат машинаар уншуулсан санал зөв байна уу гэдгийг нягтална” гэх тайлбар хийж байв/.

АН, МАН зөвшилцсөний үндсэн дээр МАН болоод 22 намын төлөөлөл уулзаж хар машины хамт 100 хувь хяналтын тооллого явуулна гэж ярьж, тохирсон. Гэтэл 50 хувьд нь хяналтын тооллого явуулна гэжээ. Энэ бол сонгуулиар АН  хар машинаар 50 хувь, МАН санал тооллогоор 50 хувийн санал авна гэдэгтэй адил сонсогдож байна. Мөн 28 суудлыг бүсчилнэ гэдэг бол зарчимгүй асуудал. Монгол улсыг таван бүс болгоод, эцэст нь бүсийг төлөөлсөн таван нам бий болгох гэж байна. Ингэснээр цаашид Монгол улсыг нэгдмэл улс биш таван жижиг хан улс болгох санаа явж байна” гэж “Шударга ёс” эвслийн бүлгээс мэдэгдэж байгаа юм. Мөн тус бүлэг 48х28 тогтолцоог эсэргүүцэв.

Мөн саналын хуудсын урт нь нэмэгдэж 1 метр урттай болох аж. Учир нь УИХ-ын сонгуулиа, аймаг, нийслэлийн сонгуультай хамтатгаад, 28-аа бүсчлэхээр саналын хуудас нэг 1 метр урттай буюу байх ёстой харьцаанаасаа хоёр дахин их болж байгаа аж. Зарим гишүүд үүнийг эсэргүүцэж Улс нэг тойрог болбол яах болж байна аа гэв.

Одоо сонгуулийн хуулийг нэгтгэх ажлын хэсгийн хуралдаанаар зарчмын зөрүүтэй саналыг хэлэлцэнэ. Уг хуралдаанаар дээрх заалтууд яаж ч өөрчлөгдөж мэдэх юм.

Т.Энхэлээ